LISTA/ CIES publikon renditjen e akademive më të mira në botë: Benfica përpara Barcelonës
Nga OraNews Përditësimi i fundit 22 Tetor 2025, 21:48
Observatori i Futbollit CIES ka publikuar si çdo vit raportin e tij mbi akademitë më produktive në botë, duke analizuar klubet që kanë formuar futbollistë aktualisht aktivë në 49 kampionate profesioniste në mbarë globin.
Renditja, e përfshirë në Weekly Post-in nr. 518, është bazuar në një indeks formimi që merr parasysh tre faktorë kryesorë: numrin e lojtarëve të formuar, nivelin e klubeve ku ata kanë luajtur gjatë vitit të fundit dhe minutat e zhvilluara në ndeshje zyrtare.
Ashtu si në vitin e kaluar, Benfica kryeson listën, duke konfirmuar reputacionin e saj si një nga akademitë më të suksesshme në futbollin botëror. Klubi portugez ka 93 lojtarë të formuar që luajnë aktualisht në kampionatet e analizuara, me një nivel mesatar klubesh 0.81 dhe 2.582 minuta të luajtura për lojtar në ndeshje zyrtare gjatë vitit të fundit.
Në vendin e dytë renditet Barcelona, me 76 futbollistë të formuar, një nivel mesatar klubesh prej 0.87 dhe 2.773 minuta të zhvilluara, ndërsa River Plate i Argjentinës plotëson podiumin me 97 lojtarë aktivë, një nivel mesatar prej 0.81 dhe 2.305 minuta.
Dhjetëshja më e mirë sipas CIES përfshin gjithashtu emra të mëdhenj të futbollit botëror:
Renditja tregon edhe një herë dominimin e klubeve evropiane dhe amerikano-jugore në zhvillimin e talenteve të rinj. Portugalia spikat me dy akademi në “Top 10” (Benfica dhe Sporting CP), ndërsa Spanja dhe Argjentina kanë nga dy përfaqësuese secila.
Raporti i CIES nënvizon rolin gjithnjë e më të madh të investimeve në strukturat e të rinjve dhe të filozofisë së formimit afatgjatë, faktorë që vazhdojnë të prodhojnë gjenerata të reja futbollistësh që shkëlqejnë në skenën ndërkombëtare.
