Republika Çeke emëron Jaroslav Kostl si trajner të përkohshëm të kombëtares
Nga OraNews Përditësimi i fundit 22 Tetor 2025, 18:52
Federata Çeke e Futbollit (FAČR) ka njoftuar se Jaroslav Kostl do të marrë drejtimin e përkohshëm të kombëtares për ndeshjet e nëntorit.
Trajneri 35-vjeçar do të udhëheqë skuadrën në miqësoren kundër San Marinos, më 13 nëntor, dhe në ndeshjen e fundit kualifikuese për Botërorin, ndaj Gjibraltarit, më 17 nëntor.
“Grumbullimi i kombëtares për nëntorin po afrohet me shpejtësi dhe për ne ishte thelbësore të ruanim vazhdimësinë,” deklaroi presidenti i FAČR-it, David Trunda, duke shpjeguar arsyen pse i është besuar drejtimi teknik Kostlit.
Kostl konsiderohet si një nga trajnerët më premtues të futbollit çek.
Ai ka ndërtuar karrierën e tij në sektorët e të rinjve të Spartës së Pragës dhe Bohemians 1905, ku është dalluar për qasjen moderne dhe aftësinë për të zhvilluar talentet e reja.
Në nivelin e ekipeve të para, ai ka punuar si ndihmës i Jindřich Trpišovský në disa prej periudhave më të suksesshme të këtij të fundit: nga Viktoria Žižkov (2014–2015) dhe Liberec (2015–2017), deri te përvoja e gjatë dhe fitimprurëse me Slavian e Pragës (2018–2023), me të cilën arriti trofe kombëtarë dhe rezultate të rëndësishme në arenën evropiane.
Që nga janari i vitit 2024, Kostl është pjesë e stafit teknik të kombëtares çeke, dhe tani do të ketë mundësinë të drejtojë vetë skuadrën, edhe pse përkohësisht.
Emërimi i tij shihet si një shenjë besimi në brezit e ri të trajnerëve çekë dhe në vazhdimësinë e një projekti që synon profesionalizëm, entuziazëm dhe stabilitet taktik në përgatitjet për sfidat e fundit të vitit.
