Përplasja/ Mandatet e kryeprokurorëve lokalë, KLP përfundon në gjykatë

Nga OraNews Përditësimi i fundit 18 Shtator 2025, 13:18

Ndërkohë që partnerët ndërkombëtarë “shuan”, ende pa nisur, një konflikt mes anëtarëve të Këshillit të Lartë të Prokurorisë (KLP) për mënyrën e zgjedhjes së kreut të ri të Prokurorisë së Posaçme (SPAK), një tjetër çështje e rëndësishme ka ndarë në dysh “qeverinë e prokurorëve” dhe rasti tashmë ka përfunduar në dyert e gjykatës.

Në diskutim është kohëzgjatja e mandateve të drejtuesve të Prokurorive lokale. Ligji parashikon qëndrimin e tyre tre vjet në detyrë, me të drejtë riemërimi. Ndërkohë, KLP-ja, me shumicë votash, ka vendosur një standart, i cili, për pjesën tjetër të anëtarëve, u shkurton mandatin e tyre në kundërshtim me përcaktimet ligjore.

Rasti e ka zanafillën në mbledhjen e 26 qershorit 2025. Këshilli i Lartë i Prokurorisë miratoi atë ditë vendimin “Për riemërimin e prokurores Dhorina Theodhori në pozicionin drejtues të Prokurorisë së shkallës së parë të juridiksionit të përgjithshëm, Korçë”.

Përplasja për Dhorina Theodhorin në Korçë

Theodhori ishte emëruar drejtuese e prokurorisë së qytetit jug-lindor në shtator të vitit 2021, për një mandat 3-vjeçar, i cili përfundonte në të njëjtin muaj, në vitin 2024.

Në përfundim të mandatit të parë, Theodhori kandidoi sërish për pozicionin drejtues. KLP-ja vonoi tej mase procedurat për ri-verifikimin e saj dhe ajo mbajti pozicionin e drejtueses së Prokurorisë së Korçës për disa muaj tej mandatit, kësaj radhe si e komanduar përkohësisht.

Përplasja/ Mandatet e kryeprokurorëve lokalë, KLP përfundon
Në foto: Prokurorja Dhorina Theodhori, në prezantimin si drejtuese e Prokurorisë së Korçës në mandatin e parë (shtator 2021)

Në qershor 2025, KLP-ja mbaroi procedurat e verifikimit dhe vendosi ri-emërimin e saj në detyrë.

Ligji 96/2016 “Për statusin e gjyqtarëve dhe prokurorëve”, në nenin 52, parashikon se drejtuesit e prokurorëve zgjidhen për një mandat 3-vjeçar, me të drejtë riemërimi. Në këtë nen parashikohet se, “kur drejtuesi në detyrë kandidon për riemërim, i nënshtrohet verifikimit të pasurisë dhe figurës nga Këshilli i Lartë i Prokurorisë”.

Po ashtu, vetëm nëse drejtuesi që është në detyrë “jep dorëheqjen ose kur nuk i pranohet kërkesa për një mandat tjetër, Këshilli publikon shpalljen për vendin e lirë për pozicionin e kryetarit për kandidatët që i plotësojnë kriteret e ngritjes në detyrë, jo më vonë se tre muaj nga mbarimi i mandatit të kryetarit në detyrë”.

Prokurorja Theodhori u bazua në këtë parashikim ligjor dhe aplikoi për t’u ri-emëruar në postin e drejtueses së Prokurorisë së Korçës.

Ndërkohë që anëtarët e KLP-së miratuan ri-emërimin e saj, ata u ndanë në një pikë të rëndësishme.

Shumica e KLP-së, e përbërë nga 7 anëtarë, vendosën se data e fillimit të mandatit të dytë të drejtueses Theodhori ishte momenti kur ajo kishte mbaruar mandatin e parë, pra në shtator 2024. Anëtarët Mirela Bogdani, Erind Gërmenji, Zeqir Hoda, Moisi Duda, Arta Mandro, Erind Mërkuri dhe Erjon Fejzulla, janë të mendimit se drejtueses duhet t’i konsiderohet si pjesë e mandatit të ri edhe periudha kur ajo ka ushtruar funksionet si e komanduar, pas përfundimit të mandatit të parë.

Përplasja/ Mandatet e kryeprokurorëve lokalë, KLP përfundon
Në foto: KLP u nda për kohëzgjatjen e mandatit të ri të drejtueses së Prokurorisë Korçë, Dhorina Theodhori

Nga ana tjetër, pakica prej katër anëtarësh vlerësoi se mandati i ri 3-vjeçar i drejtueses fillonte në ditën e ri-emërimit të saj, pra në 26 qershor 2025 dhe përfundonte në të njëjtën datë, në vitin 2028. Gjithashtu, pakica vlerësoi se vendimi i shumicës cënonte rëndë ligjin, përsa i përket kohëzgjatjes së mandatit 3-vjeçar të drejtuesit, i cili nis në momentin e ri-emërimit.

Vendimi u zbardh në 16 Korrik 2025 dhe prokurorja Dhorina Theodhori e ankimoi atë në Gjykatën e Apelit Administrativ, ku kërkon që mandati i ri të nisë ditën e ri-emërimit, pra në qershor 2025.

“Ndarja” për Kreshnik Ajazin në Elbasan

Ndërkohë që gjykata ende nuk ka marrë një vendim, shumica në Këshillin e Lartë të Prokurorisë, me shumicë votash, aplikoi të njëjtin standard edhe për ri-emërimin e drejtuesit të Prokurorisë së Elbasanit, Kreshnik Ajazi.

Prokurori Ajazi u emërua drejtues në prokurorinë e Elbasanit në mars të vitit 2021 dhe mandati i tij 3-vjeçar përfundonte në mars 2024. Ai, bazuar në të drejtën e tij ligjore, ri-aplikoi për postin e drejtuesit. KLP-ja u vonua shumë në ri-vlerësimin e prokurorit Ajazi dhe veproi me caktimin e tij të përkohshëm deri në momentin që do të vendosej nëse ai do të ri-emërohej ose jo.

Përplasja/ Mandatet e kryeprokurorëve lokalë, KLP përfundon
Në foto: Kryeprokurori i Elbasanit, Kreshnik Ajazi, në ditën e emërimit në mandatin e parë (mars 2021)

Në 11 Shtator 2025, Këshilli i Lartë i Prokurorisë vendosi që Kreshnik Ajazi të rikonfirmohej në detyrën e drejtuesit të Prokurorisë së Elbasanit. Por, sërish, shumica e KLP-së vendosi që kohëzgjatja e mandatit të tij i ri të llogaritej që në momentin e përfundimit të mandatit të parë, pra në mars 2024. Në këtë mënyrë, KLP-ja, me shumicën e votave të anëtarëve të saj, vendosi që Ajazi do të qëndrojë në postin e drejtuesit të Prokurorisë së Elbasanit deri në 24 mars 2027.

Sërish, pakica prej katër anëtarësh votoi kundër, duke vlerësuar se mandati i tij fillonte në momentin e emërimit të ri, në 11 shtator 2025 dhe përfundon pas tre vitesh, në shtator 2028.

Një tjetër rast pritet të përfshihet në të njëjtën vorbull përplasjeje ligjore, përsa kohë Gjykata e Apelit Administrativ nuk është shprehur për ankimin e kryeprokurores së Korçës, Dhorina Theodhori, një vendim që pritet të standardizojë praktikën e përçarë të Këshillit të Lartë të Prokurorisë.

Përplasja/ Mandatet e kryeprokurorëve lokalë, KLP përfundon
Në foto: Arens Çela, drejtues i Prokurorisë së Tiranës

Arens Çela u emërua drejtues i Prokurorisë së Tiranës në 12 Tetor 2022 dhe mandati i tij 3-vjeçar përfundon në tetor 2025. Çela shprehu vullnetin për rikandimin si drejtues i Prokurorisë së kryeqytetit në 12 Prill të këtij viti, bazuar në përcaktimet ligjore se kryetari në detyrë mund të riaplikojë 6 muaj para përfundimit të mandatit të parë.

Aktualisht, KLP-ja është ende në fazën e verifikimit të kandidaturës së tij, bazuar në nenin 52 të ligjit “Për statusin e gjyqtarëve dhe prokurorëve”, ndërkohë që kanë mbetur edhe pak ditë nga përfundimi i mandatit të parë të Arens Çelës. /Nga Boldnews.al