EMRAT/ Fajtorë për emigracion të paligjshëm dhe vjedhje, ekstradohen nga Italia dhe Gjermania dy të rinj
Nga OraNews Përditësimi i fundit 15 Shtator 2025, 09:08
Dy shtetas shqiptarë janë ekstraduar nga Italia dhe Gjermania drejt Shqipërisë. Amarildo Luca, 29 vjeç, lindur në Dibër, u ekstradua nga Italia.
Ai ishte shpallur në kërkim ndërkombëtar pas caktimit të masës së sigurisë “Arrest në burg” nga Gjykata e Shkallës së Parë Kundër Korrupsionit dhe Krimit të Organizuar.
Po ashtu, Francesko Berisha, 20 vjeç, lindur në Tiranë, u ekstradua nga Gjermania. Ai ishte dënuar dy herë nga Gjykata e Tiranës për vjedhje – njëherë me 8 muaj burg në vitin 2021 dhe më pas me 6 muaj burgim në vitin 2024.
Njoftimi:
-Ekstradohet nga Italia, një 29-vjeçar i akuzuar nga GjKKO-ja, për dhënie ndihmë për emigrim të kundërligjshëm drejt Mbretërisë së Bashkuar, ShBA-së dhe Kanadasë.
-Ekstradohet nga Gjermania, një 20-vjeçar i dënuar 2 herë, për vjedhje në kryeqytet.
Si rezultat i bashkëpunimit të ngushtë të specialistëve të Interpol Tiranës dhe homologëve të Interpol Romës dhe të Interpol Wiesbaden, u finalizuan procedurat e ekstradimit nga Italia dhe nga Gjermania, në Shqipëri, të shtetasve:
-A. L., 29 vjeç, lindur në Dibër, pasi në vitin 2024, Gjykata e Shkallës së Parë Kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprën penale “Ndihma për kalim të paligjshëm të kufijve”, kryer në bashkëpunim.
Gjatë periudhës 2022-2024, shtetasi A. L., në bashkëpunim me shtetas të tjerë, iu ka dhënë ndihmë shtetasve të ndryshëm, për kalim të kundërligjshëm të kufijve, drejt Mbretërisë së Bashkuar, ShBA-së dhe Kanadasë.
-F. B., 20 vjeç, lindur në Tiranë, pasi Gjykata e Tiranës e ka dënuar dy herë, përkatësisht me 8 muaj në vitin 2021 dhe 6 muaj burgim në vitin 2024, për veprën penale “Vjedhja”.
