Lushnjë/ 46-vjeçari kapet me fara kanabisi dhe lidhje të paligjshme të energjisë elektrike, arrestohet nga policia
Nga OraNews Përditësimi i fundit 8 Gusht 2025, 10:10
Një 46-vjeçar është arrestuar në flagrancë nga specialistët e Seksionit për Hetimin e Narkotikëve, pas një kontrolli të befasishëm në banesën e tij në fshatin Pirrë.
Shtetasi A. T., banues në këtë fshat, u kap me 124 fara kanabisi dhe një sasi të vogël të kësaj lënde narkotike, të cilat u sekuestruan nga shërbimet e Komisariatit të Policisë Lushnjë si provë materiale.
Gjatë kontrollit, efektivët konstatuan gjithashtu se në banesë kishte një lidhje të paligjshme të energjisë elektrike, çka përbën një tjetër vepër penale për të cilën ai do të përballet me drejtësinë.
Materialet hetimore i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lushnjë, për veprime të mëtejshme procedurale.
Policia po vijon hetimet për të zbuluar nëse 46-vjeçari kishte lidhje me ndonjë rrjet të shpërndarjes së lëndëve narkotike.
