Tour de France/ Arensman fiton etapën e 19-të, lë pas Vingegaard dhe Pogacar
Nga OraNews Përditësimi i fundit 25 Korrik 2025, 20:26
Thymen Arensman është sërish protagonist në Tour de France.
Çiklisti holandez i skuadrës INEOS Grenadiers ka triumfuar në etapën e 19-të të garës më prestigjioze të çiklizmit botëror, duke siguruar fitoren e tij të dytë në këtë edicion pas një paraqitjeje mbresëlënëse në finishin malor të La Plagne.
Arensman mbërriti në vijën e finishit vetëm dy sekonda përpara dy rivalëve më të mëdhenj të klasifikimit të përgjithshëm: danezit Jonas Vingegaard (Team Visma | Lease a Bike) dhe sllovenit Tadej Pogacar (UAE Team Emirates), të cilët nuk arritën ta kapin në metrat e fundit.
Etapa nisi me një arratisje të zgjeruar, ku mes emrave më të spikatur ishin Primoz Roglic (Red Bull–BORA–Hansgrohe), Tobias Foss (INEOS Grenadiers), Einer Rubio (Movistar), Victor Campenaerts (Visma), Lenny Martinez (Bahrain-Victorious), Michael Storer (Tudor) dhe Bruno Armirail (Decathlon AG2R).
Megjithatë, grupi kryesor nuk lejoi shumë hapësirë dhe në ngjitjen e Cormet de Roselend situata nisi të ndryshonte.
Roglic dhe Paret-Peintre tentuan të shkëputeshin, duke marrë me vete edhe Martinez, por në zbritje ata u arritën.
Fillimi i ngjitjes finale drejt La Plagne shënoi momentin vendimtar: Pogacar sulmoi i pari, duke nxitur reagimin e Vingegaard dhe Arensman.
Ky i fundit u tregua më i freskët, duke kaluar në kundërsulm dhe duke ruajtur avantazhin deri në fund.
Në renditjen e përgjithshme, Pogacar ruan fanellën e verdhë me një epërsi prej 4 minutash e 24 sekonda ndaj Vingegaard dhe 11 minutash e 9 sekonda ndaj gjermanit Florian Lipowitz (Red Bull–BORA–Hansgrohe), kur kanë mbetur vetëm dy etapa deri në përfundim të garës.
Etapa e parafundit zhvillohet nesër, me një itinerar prej 184.2 kilometrash nga Nantua në Pontarlier, një provë e fundit para finales së madhe në Paris.
