Zyrtare/ Talenti 18-vjeçar firmos kontratën e parë profesionale me Liverpool-in
Nga OraNews Përditësimi i fundit 23 Korrik 2025, 17:38
Liverpooli ka zyrtarizuar sot firmën e kontratës së parë profesionale me talentin 18-vjeçar, Kareem Ahmed.
Futbollisti premtues, që iu bashkua akademisë së klubit në moshën vetëm gjashtëvjeçare, ka tërhequr vëmendjen që në debutimin e tij me ekipin U-18, kur shënoi në një ndeshje të FA Youth Cup ndaj Bournemouthit në dhjetor të vitit 2022.
Ahmed është një lojtar i gjithanshëm, që mund të luajë si sulmues apo mesfushor ofensiv.
Ai njihet për aftësinë e tij në krijimin e rasteve dhe shpesh është një rrezik konstant për mbrojtjet kundërshtare.
Në sezonin e fundit me skuadrën U-18, ai realizoi shtatë gola dhe dhuroi pesë asistime, duke dhënë një kontribut të rëndësishëm në ecurinë e ekipit.
Gjithashtu, Ahmed ka marrë pjesë edhe në UEFA Youth League, ku është përballur me ekipe të njohura si Bologna dhe Leipzig, duke përfituar eksperiencë ndërkombëtare të vlefshme për zhvillimin e tij.
Për sezonin 2025-2026, ai do të bëjë hapin e madh drejt skuadrës U-21, nën drejtimin e trajnerit të ri, Rob Page.
Ky është një moment kyç në karrierën e tij, me klubin që beson fort në potencialin dhe cilësitë që ai sjell në repartin ofensiv.
Kareem Ahmed shihet si një nga ‘yjet’ e ardhshëm të Liverpoolit dhe futbollit anglez.
