Hakerët shënjestrojnë Administratën Kombëtare të Sigurisë Bërthamore të SHBA-së, nuk arritën të merrnin informacione të klasifikuara
Nga OraNews Përditësimi i fundit 23 Korrik 2025, 12:14
SHBA- Agjencia amerikane përgjegjëse për projektimin dhe mirëmbajtjen e armëve bërthamore është vënë në shënjestër të hakerave.
Agjencia amerikane ishte një nga shumë të prekurat nga sulmi masiv kibernetik ndaj softuerit Sharepoint të Microsoft.
Megjithatë, hakerat nuk ishin në gjendje të fitonin akses në informacione të ndjeshme ose të klasifikuara nga Administrata Kombëtare e Sigurisë Bërthamore.
Kjo agjenci, e cila është një degë gjysmë-autonome e Departamentit të Energjisë, është përgjegjëse për prodhimin dhe çmontimin e armëve bërthamore.
Administrata Kombëtare e Sigurisë Bërthamore ka një mision të gjerë, i cili përfshin pajisjen e Marinës me reaktorë bërthamorë për nëndetëset dhe reagimin ndaj emergjencave radiologjike, ndër të tjera detyra.
Agjencia gjithashtu luan një rol kyç në luftën kundër terrorizmit dhe transportimin e armëve bërthamore në të gjithë vendin.
Hakerët arritën të depërtonin në shërbim si pjesë e një sulmi të vitit 2020 ndaj një programi softuerik të përdorur gjerësisht nga SolarWinds Corp.
Një zëdhënës i ministrisë tha në atë kohë se programi keqdashës ishte “izoluar vetëm për rrjetet e biznesit”.
Microsoft fajësoi hakerët kinezë të sponsorizuar nga shteti për sulmet, të cilët shfrytëzuan të metat në softuerin e menaxhimit të dokumenteve SharePoint, i cili përdoret gjerësisht, në një fushatë që ka shkelur qeveritë, bizneset dhe organizatat e tjera në të gjithë botën.
Në disa raste, hakerat kanë vjedhur kredencialet e hyrjes, duke përfshirë emrat e përdoruesit, fjalëkalimet, kodet e hashuara dhe tokenët.
Përveç Departamentit të Energjisë të SHBA-së, hakerat kanë depërtuar në sisteme që u përkasin qeverive kombëtare në Evropë dhe Lindjen e Mesme, Departamentit të Arsimit të SHBA-së, Departamentit të të Ardhurave të Floridës dhe Asamblesë së Përgjithshme të Rhode Island.
