Trump udhëton për në Teksas pas përmbytjeve që vr*në 120 persona dhe lanë 160 të zhdukur
Nga OraNews Përditësimi i fundit 11 Korrik 2025, 17:44
Presidenti Donald Trump dhe Zonja e Parë Melania Trump udhëtuan sot drejt Kerrville, Teksas, me avionin presidencial Air Force One, për të inspektuar nga afër dëmet e shkaktuara nga përmbytjet e shpejta që goditën Teksasin qendror fundjavën e kaluar.
Kerrville, qyteti më i goditur nga kjo katastrofë natyrore, është ndalesa kryesore e vizitës së presidentit, i cili do të marrë pjesë në një tryezë të rrumbullakët me ekipet e emergjencës dhe zyrtarët lokalë.
Në takim pritet të jenë të pranishëm edhe Guvernatori Greg Abbott dhe përfaqësues të agjencive shtetërore e federale të ndihmës.
Qëllimi i këtij takimi është diskutimi mbi përpjekjet e rimëkëmbjes dhe nevojat më urgjente të komuniteteve të prekura.
Nuk dihet ende nëse Presidenti Trump do t’u përgjigjet pyetjeve të gazetarëve lidhur me reagimin shtetëror dhe federal ndaj përmbytjeve, por burime pranë Shtëpisë së Bardhë lënë të kuptohet se ai do të fokusohet në mesazhin e unitetit dhe mbështetjes.
Vizita e presidentit vjen disa ditë pasi Sekretarja e Sigurisë Kombëtare, Kristi Noem, vizitoi zonat e prekura, përfshirë Kampin Mystic – një kamp veror për vajza që u shkatërrua plotësisht nga përmbytjet.
Autoritetet po punojnë për vlerësimin e dëmeve dhe koordinimin e ndihmave për të prekurit.
