Trump nis spastrimin, 1,350 punonjës të Departamentit të Shtetit pushohen nga puna
Nga OraNews Përditësimi i fundit 11 Korrik 2025, 17:33
Administrata e Presidentit Donald Trump ka filluar zbatimin e një riorganizimi të thellë në Departamentin e Shtetit, duke pushuar nga puna mbi 1,350 punonjës me bazë në SHBA, një veprim që po shkakton shqetësim të madh për pasojat në politikën e jashtme amerikane.
Sipas një njoftimi të brendshëm të siguruar nga Reuters, ndër të pushuarit janë 1,107 oficerë të shërbimit civil dhe 246 oficerë të shërbimit të huaj.
Kjo lëvizje përbën një ndër ndërhyrjet më të mëdha në strukturën diplomatike amerikane në dekada dhe është konsideruar nga kritikët si një goditje serioze ndaj kapaciteteve të SHBA për të mbrojtur dhe avancuar interesat e saj jashtë vendit.
Ekspertët paralajmërojnë se largimi masiv i stafit me përvojë mund të dobësojë ndjeshëm praninë dhe ndikimin diplomatik të Uashingtonit në një kohë të tensioneve të larta ndërkombëtare.
Ende nuk dihet nëse do të ketë pushime të mëtejshme, por burime nga Departamenti i Shtetit theksojnë se kjo është pjesë e një plani më të gjerë për “efikasitet dhe ristrukturim”.
Megjithatë, zërat kritikë nga radhët e opozitës dhe ish-zyrtarë të lartë diplomatikë e kanë cilësuar këtë si një përpjekje për të politizuar shërbimin e jashtëm dhe për të dobësuar institucionet tradicionale të diplomacisë amerikane.
