Papa Leone XIV: Planeti në rrezik, natyra është kthyer në fushëbetejë
Nga OraNews Përditësimi i fundit 2 Korrik 2025, 15:01
Në një mesazh të fuqishëm dhe tejet aktual, Papa ka lëshuar një paralajmërim të prerë mbi krizën klimatike që po përkeqësohet dita-ditës, duke sjellë viktima dhe pasoja të rënda në Itali dhe në mbarë botën për shkak të temperaturave ekstreme.
“Në shumë pjesë të botës, është bërë tashmë e dukshme se toka jonë po shkon drejt shkatërrimit,” deklaroi Ati i Shenjtë. Ai vuri në dukje se padrejtësia, shkelja e të drejtës ndërkombëtare dhe të drejtave të popujve, pabarazitë dhe etja për përfitime po sjellin shpyllëzim, ndotje dhe humbje të biodiversitetit.
“Fenomenet ekstreme natyrore, të shkaktuara nga ndryshimet klimatike prej veprimeve njerëzore, po bëhen gjithnjë e më të shpeshta dhe më të dhunshme,” theksoi ai.
Papa Leone XIV paralajmëroi se mungon ende vetëdija e plotë se shkatërrimi i natyrës nuk i prek të gjithë në mënyrë të barabartë. “Të shkelësh drejtësinë dhe paqen do të thotë të godasësh më fort më të varfërit, të përjashtuarit, të margjinalizuarit. Shembull i kësaj është vuajtja e popujve indigjenë,” u shpreh ai.
Ai shtoi se natyra shpesh kthehet në monedhë shkëmbimi, një mjet për përfitime politike apo ekonomike.
“Krijimi po shndërrohet në një fushëbetejë për kontrollin e burimeve jetike: zonat bujqësore dhe pyjet janë kthyer në territore të rrezikshme për shkak të minave, luftërat shpërthejnë për burimet ujore, dhe shpërndarja e padrejtë e lëndëve të para thellon varfërinë dhe rrezikon stabilitetin social,” përfundoi Papa.
