Kievi: Zelensky dhe Trump dakord për një takim të dytë! Zelensky: Nëse arrihet fundi i luftës, faleminderit President!

Nga OraNews Përditësimi i fundit 26 Prill 2025, 16:01

Presidenti amerikan, Donald Trump dhe homologu i tij ukrainas, Volodimir Zelensky ranë dakord të takohen përsëri sot, tha zëdhënësi i presidencës ukrainase.

Zelensky pati një takim në kuadër të funeralit të papës me Trump, Macron dhe Starmer.

Shtëpia e Bardhë e quajti takimin me Zelenskyn “shumë produktiv”.

Takimi zgjati rreth 10 minuta.

Pasi i bëri homazhe papës, Trump, në vend që të dilte në oborrin e kishës, u takua me udhëheqësin ukrainas dhe më pas, pas një takimi të shkurtër ballë për ballë, ata dolën njëri pas tjetrit, të shoqëruar nga gratë e tyre Melania dhe Olena, në shesh.

Zelensky, në vend të uniformës së zakonshme ushtarake, është veshur me të zeza.

Fotot e publikuara nga zyra e Zelensky-t tregojnë të dy liderët të ulur përballë njëri-tjetrit në mes të një salle mermeri. “Ata patën një bisedë produktive,” deklaroi më herët një zëdhënës i Shtëpisë së Bardhë.

Një tjetër fotografi e publikuar tregon Trump-in dhe Zelensky-n duke qëndruar në të njëjtin vend bashkë me kryeministrin britanik Keir Starmer dhe presidentin francez Emmanuel Macron.

Kievi: Zelensky dhe Trump dakord për një takim të dytë!

Presidenti i Ukrainës, Volodymyr Zelensky, deklaroi se takimi që zhvilloi në Vatikan me presidentin e SHBA-së, Donald Trump, mund të rezultojë historik, nëse arrihet përfundimi i luftës, temë për të cilën ata diskutuan.

“Takim i mirë. Ballë për ballë, arritëm të diskutojmë shumë gjëra. Shpresojmë për një rezultat nga gjithçka që u diskutua,” shkroi Zelensky në një postim të tij.

Ai tha se temat e diskutimit përfshinin “mbrojtjen e jetës së popullit tonë, një armëpushim të plotë dhe pa kushte, si dhe një paqe të besueshme dhe të qëndrueshme që do të parandalojë përsëritjen e luftës.”

Zelensky shtoi: “Ishte një takim shumë simbolik që ka potencialin të bëhet historik nëse arrijmë rezultate të përbashkëta. Faleminderit, President Donald Trump!”