Estonia rrit ndjeshëm buxhetin e mbrojtjes, miraton fonde shtesë
Nga OraNews Përditësimi i fundit 26 Prill 2025, 09:04
Qeveria e Estonisë ka miratuar një plan shumë-miliardë eurosh që do të rrisë ndjeshëm investimet në mbrojtje, duke e çuar shpenzimin në mbi 5% të Prodhimit të Brendshëm Bruto, në përputhje me kërkesat e Presidentit amerikan Donald Trump për anëtarët e NATO-s.
Projektligji katërvjeçar i miratuar përfshin një fond shtesë prej 2.8 miliardë eurosh që do ta ngrejë nivelin e shpenzimeve në një mesatare prej 5.4% të PBB-së deri në vitin 2029.
Ministri i Mbrojtjes, Hanno Pevkur, e cilësoi këtë si një vendim historik, duke theksuar se “Estonia nuk ka ndarë kurrë më parë kaq shumë fonde shtesë për mbrojtjen kombëtare brenda një viti.”
Ai sqaroi se rritja fillon që nga viti i ardhshëm dhe do të qëndrojë në nivele të larta për një kohë të gjatë për të përmbushur objektivat e NATO-s për aftësitë ushtarake.
Rritja e shpenzimeve pritet të përkthehet në një zgjerim të ndjeshëm të kapaciteteve ushtarake të vendit, duke përfshirë më shumë mbrojtje ajrore me rreze të mesme, forca zbulimi, sisteme të avancuara komunikimi dhe aftësi detare, si dhe rritje të rezervave dhe numrit të personelit në Forcat e Mbrojtjes së Estonisë.
Gjenerali Andrus Merilo, shef i EDF-së, tha se ky vendim vjen si përgjigje ndaj përkeqësimit të situatës së sigurisë në rajon, të shkaktuar nga agresioni i Rusisë ndaj Ukrainës.
Ai shtoi se objektivi i Estonisë nuk është vetëm të ndjekë zhvillimet ushtarake të Rusisë, por t’i tejkalojë ato në bashkëpunim me aleatët.
Kjo lëvizje e Estonisë vjen disa javë para samitit të NATO-s që do të mbahet në Hagë më 24-25 qershor, dhe pas paralajmërimeve të forta të Presidentit Trump, i cili ka kërkuar që vendet anëtare të rrisin shpenzimet e tyre të mbrojtjes në 5% të PBB-së, duke i quajtur të papranueshme objektivat e mëparshme prej 2%.
Ai ka kërcënuar se SHBA mund të tërhiqet nga NATO nëse këto kërkesa nuk plotësohen.
