Yllka Mujo për “Ora News”: Margarita Xhepa ishte një grua e shkëlqyer, një aktore e madhe, një nënë jashtëzakonisht e përkushtuar! Iku nga kjo jetë e plotësuar
Nga Lili Saraçi Përditësimi i fundit 3 Prill 2025, 11:55
Ylli i kinematografisë shqiptare, Margarita Xhepa ka ndërruar jetë këtë të enjte në moshën 92-vjeçare duke lënë pas një pasuri të madhe në kinemanë dhe teatrin shqiptar.
Në një lidhje direkte në studion e lajmeve në “Ora News”, me moderatore Lili Saraçin aktorja Yllka Mujo shprehet e trishtuar, teksa e quan një lajm të trishtë për të gjithë Shqipërinë.
“Një grua e shkëlqyer, një aktore e madhe, një nënë jashtëzakonisht e përkushtuar, një njeri jashtëzakonisht modest, një punëtore e palodhur.
Nuk e di çfarë epitetesh mund t’i vësh një njeriu që ka bërë një emër kaq të madh qoftë në kinema qoftë në teatër.
Margarita ishte gruaja më e bukur që ka pasur vendi, me tiparet e një njeriu perfekt”, shprehet Mujo.
E pikëlluar nga humbja e Margaritës, Mujo thotë: “Çfarë mund të them për Margaritën. Një lajm shumë i trishtuar edhe pse e dinim që nuk është në gjendje shumë të mirë, mirëpo shpresa gjithmonë na mbante që mund të ndodhë edhe çudia.
Mirëpo nuk ndodhi. Nuk ndodhi dhe është shumë e trishtueshme në radhë të parë për familjen, për komunitetin e artistëve që e kemi njohur dhe kemi punuar me të, edhe për mbarë Shqipërinë”.
E pyetur nëse Margarita kishte ndonjë peng, aktorja thotë se: “Ajo iku nga kjo jetë e plotësuar, asnjë brengë nuk kishte”.
NDIQNI INTERVISTËN E PLOTË ME AKTOREN YLLKA MUJO DHËNË SOT PËR “ORA NEWS”
