Tjetër problem fizik te Bayerni, portugezi stërvitet veçmas para sfidës me Augsburgun
Nga OraNews Përditësimi i fundit 2 Prill 2025, 16:41
Në shtëpinë e Bayern-it vazhdojnë të mbërrijnë lajme të këqija nga infermieria. Pas dëmtimeve të rënda të Alphonso Davies dhe Dayot Upamecano-s, si dhe frakturës në metatars të Hiroki Ito-s, Vincent Kompany duhet të përballet edhe me gjendjen e paqëndrueshme të Raphael Guerreiro-s.
Portugezi të mërkurën zhvilloi vetëm një punë të personalizuar dhe për momentin nuk është ende e qartë nëse do të thirret për ndeshjen e ardhshme të Bundesligës kundër Augsburg-ut.
Nëse Guerreiro nuk do të jetë i gatshëm, edhe duke pasur parasysh angazhimin e ardhshëm me Inter-in, sipas asaj që raporton "Bild", Kompany mund të zhvendosë në të majtë Sacha Boey ose t’i besojë një lojtari nga akademia.
Situata konfirmon emergjencën e madhe te Bayern-i dhe lë ende shumë dyshime në lidhje me Champions League, jo vetëm në mbrojtje.
Përveç monitorimit të situatës së Raphael Guerreiro-s, Kompany duhet të vlerësojë me shumë kujdes edhe gjendjen e Leon Goretzka-s dhe Kingsley Coman-it.
Të dy janë stërvitur veçmas ditët e fundit dhe është e vështirë të rrezikohen kundër Augsburg-ut, duke pasur në horizont sfidën e rëndësishme të parë kundër skuadrës së Simone Inzaghi-t.
