Kundërshtoi dhe goditi policin, arrestohet 31-vjeçari në Tiranë
Nga OraNews Përditësimi i fundit 19 Mars 2025, 11:35
Një 31-vjeçar është arrestuar nga Policia e Tiranës, pasi kundërshtoi dhe goditi për shkak të detyrës, punonjësin e Policisë Rrugore, në detyrë.
Sipas uniformave blu, ngjarja ndodhi më datë 18.03.2025, te rrethrrotullimi i Unazës së Re, në rrugën “Sotir Caci”, ku punonjësi i Komisariatit të Policisë Rrugore Tiranë që ishte i planëzuar me shërbim, i ka bërë shenjë ndalimi një automjeti, pasi ka konstatuar lëvizje të pakontrolluara në rrugë.
Drejtuesi i automjetit nuk i është bindur urdhrit të punonjësit të Policisë për të ndaluar, por ka vijuar lëvizjen.
Duke vijuar lëvizjen, drejtuesi i automjetit e ka tërhequr punonjësin e Policisë për disa metra, duke i rrezikuar jetën. Punonjësi i Policisë e ka ndjekur dhe ndaluar automjetin, dhe i ka kërkuar drejtuesit, t’i paraqesë dokumentacionin. Drejtuesi i automjetit e ka kundërshtuar dhe më pas e ka goditur punonjësin e Policisë, duke i shkaktuar dëmtime fizike.
Shërbimet e Policisë kanë shoqëruar në Komisariat drejtuesin e automjetit, dhe në përfundim të veprimeve procedurale për rastin, specialistët për Hetimin e Krimeve të Komisariatit të Policisë Nr. 4 bënë arrestimin në flagrancë të tij, konkretisht shtetasit F. K., 31 vjeç, banues në Tiranë.
Materialet procedurale iu referuan Prokurorisë së Tiranës, për veprime të mëtejshme.
