Zuri vendin e të dënuarit nga GJKKO, ndryshohet sërish prefekti i Qarkut të Kukësit
Nga OraNews Përditësimi i fundit 5 Shkurt 2025, 16:35
Vetëm pak muaj nga zgjedhjet e 11 majit, qeveria bën ndryshime në radhët e prefekturave të vendit.
Kështu, Prefekti i Qarkut të Kukësit Agron Geca është shkarkuar pas 14 muajve në detyrë.
Në vendin e tij, qeveria ka emëruar Dritan Baji
Kujtojmë se Agron Gecës iu besua kjo detyrë më 12 dhjetor 2023, vetëm një javë pasi Prokuroria e Posaçme njoftoi se Prefekti Granit Gjana ishte marrë në cilësinë e personit të pandehur për veprën penale "Shkelje e barazisë në tendera".
VENDIMI PËR LIRIMIN DHE EMËRIMIN NË DETYRË TË PREFEKTIT TË QARKUT TË KUKËSIT
Në mbështetje të neneve 100 e 114 të Kushtetutës dhe të nenit 5 të ligjit nr.107/2016, “Për prefektin e qarkut”, të ndryshuar, me propozimin e ministrit të Brendshëm, Këshilli i Ministrave
V E N D O S I:
1. Z. Agron Geca, prefekt i Qarkut të Kukësit, lirohet nga kjo detyrë.
2. Z. Dritan Baji emërohet prefekt i Qarkut të Kukësit.
Ky vendim hyn në fuqi menjëherë dhe botohet në “Fletoren zyrtare”.
