Zjarri “përpin” pallatin! Shkrumbohet apartamenti e disa zyra, zjarrfikësit izoluan flakët. Goxhaj: Ja çfarë e shkaktoi
Nga OraNews Përditësimi i fundit 20 Janar 2025, 13:50
Një godinë zyrash u përfshi nga flakët në zonën e Komunës së Parisit. Një apartament dhe disa zyra u shkrumbuan ndërsa zjarrëfikësit arritën ta izolojnë vatrën në kohë.
Kjo javë nisi me zjarr në Kryeqytet. Këto janë pamjet e një godine zyrash në zonën e Komunës së Parisit që u përfshi nga flakët vetëm një orë përpara mesditës.
Flakët ranë në katin e katërt të pallatit, ndërsa vetëm disa minuta më vonë u përfshinë edhe tre katet e mësipërme.
3 ekipe zjarrfikësesh dhe 3 automjete punuan për shuarjen e flakëve, një punë e cila zgjati për rreth një orë e 30 minuta.
Jashtë ambienteve të godinës qëndronin banorët dhe punonjësit e zonës të cilët u evakuuan që në minutat e para. Pranë tyre ishin dhe ambulancat.
Pas shuarjes së flakëve, Shefi i Departamentit të Zjarrfikëses në Tiranë, Shkëlqim Goxhaj shpjegoi dhe zanafillën e ngjarjes.
Prioritet kryesor sipas Goxhajt ishte evakuimi i banorëve.
Theksoi se gjatë stinës së dimrit situata me flakët në godinat e banimit apo zyrat bëhet problematike.
Apeloi që qytetarët të tregojnë kujdes me pajisjet e ngrohjes dhe gatimit.
Pas punës së zjarrfikëseve nisën dhe hetimet për të zbuluar se çfarë e shkaktoi atë.
