VIDEO / Reali kalon në finale, do të jetë një “El Clasico” gara për Superkupën e Spanjës!
Nga OraNews Përditësimi i fundit 10 Janar 2025, 07:23
Finalja e Superkupës së Spanjës do të jetë një “El Clasico”. Në përmbushje të pritshmërive, Reali i Madridit mposhti 3-0 Mallorca-n në gjysmëfinalen e luajtur në stadiumin “Mbreti Abdullah” në Jeddah e tashmë ‘përvesh mëngët’ për sfidën me rivalët e përjetshëm.
Në fakt, nuk ishte një ndeshje shumë e lehtë për Realin, me Mallorca-n të vendosur mirë në fushë, e gatshmë për të bërë surprizën e mundshme. Pjesa e parë u mbyll pa gola, kuptohet me Realin dominues, që iu afrua golit me Bellingham.
Pikërisht futbollisti anglez zhbllokoi rezultatin në minutën e 62-të, në aksionin që Rodrygo pa t’i mohohej goli nga shtylla. Në kohën shtesë, një pasim i Brahim Diaz për Mbapennë, me topin që devijohet nga një mbrojtës e përfundon në rrjetë. Kishte kohë për një tjetër gol të shënuar nga Rodrygo për rezultatin përfundimtar 3-0. Të dielën, në orën 20:00, në të njëjtin stadium, do të luhet finalja e madhe Barcelona – Real Madrid.
