Stërvitja para finales, Leao ngroh Conceição-n, gripi ndalon Gabbian
Nga OraNews Përditësimi i fundit 5 Janar 2025, 21:41
Vijnë lajme pozitive nga stërvitja e fundit e Milanit në prag të finales së Superkupës Italiane kundër Interit, e cila është planifikuar të zhvillohet të hënën, në orën 20:00. Rafa Leão është rikthyer në stërvitje me pjesën tjetër të grupit dhe pritet të jetë i gatshëm për trajnerin Sérgio Conceição për derbin. Portugezi, megjithatë, nuk ka në këmbë 90 minuta lojë, ndaj me shumë gjasë do të nisë ndeshjen nga stoli, por do të jetë një armë shtesë në dispozicion të trajnerit kuqezi.
Në grup ishin gjithashtu Ruben Loftus-Cheek dhe Alex Jimenez, i cili kishte dalë i dëmtuar nga sfida e fundit. Megjithatë, me kalimin në skemën 4-4-2, as ai nuk pritet të jetë titullar.
Nga ana tjetër, Matteo Gabbia nuk mori pjesë në stërvitje për shkak të një sindrome gripale dhe prania e tij në finalen e turneut në Riad duhet konsideruar shumë të dyshimtë. Conceição pritet të mbështetet sërish te dyshja qendrore Tomori dhe Thiaw, e njëjta që luajti në gjysmëfinalen kundër Juventusit.
Të pranishëm ishin gjithashtu Zlatan Ibrahimovic dhe Geoffrey Moncada, së bashku me Alessandro Florenzin, i cili është ende i dëmtuar. Dy drejtuesit ndoqën nga afër fjalimin motivues të Conceição-s, i cili, përpara se të niste stërvitjen, mblodhi skuadrën në rreth për t’i motivuar.
