PL: Është koha që kjo Narkoqeveri të marri nga të gjithë ne përgjigjen që meriton

Nga OraNews Përditësimi i fundit 9 Dhjetor 2024, 12:25

Deklarata e Zëdhënëses të Presidentit të Partisë së Lirisë, znj. Jasmira Memelli

Sot, kam nderin të flas për një grup të veçantë dhe shumë të rëndësishëm të shoqërisë sonë – për ata qytetarë që përballen me aftësi të kufizuara. Ky grup është një pjesë integrale e komunitetit tonë dhe, përkundër vështirësive, ata tregojnë guxim, forcë dhe një angazhim të pazakontë për të jetuar jetën në mënyrën më të plotë të mundshme.

Megjithatë, ajo që na shqetëson të gjithëve është indiferenca dhe mungesa e mbështetjes të nevojshme për këta qytetarë. Diskriminimi që i bëhet kësaj shtrese të shoqërisë është qartazi i dukshëm edhe tek projektimi i Buxheti të vitit 2025, që është pothuajse me 0 fonde për këtë kategori, ky është një alarm i fortë për të gjithë ne. Kjo është një situatë që nuk mund ta pranojmë, sepse ata që kanë nevojë më shumë për mbështetje meritojnë më shumë se sa të presin në heshtje, pa pasur mundësi për zhvillim, edukim, punësim apo shërbime që përmirësojnë cilësinë e jetës.

Duke folur për nevojën urgjente për mbështetje, është e rëndësishme të kuptojmë se kjo nuk është vetëm një çështje financiare. Kjo është çështje e dinjitetit dhe e mundësive për të krijuar një shoqëri që e respekton dhe përkrah çdo individ, pavarësisht nga vështirësitë që mund të ketë.

Është e domosdoshme që të rrisim fondet për ata që kanë aftësi të kufizuara, që të krijojmë mundësi të barabarta për të gjithë. Duhet të investojmë në programe që mundësojnë aksesin në arsim, në punësim, në shërbime shëndetësore dhe në alternativa që u japin atyre mundësinë të kontribuojnë aktivisht në shoqëri.

Por këto nuk kanë rëndësi për Kryeministrin e vendit, pasi më të rëndësishëm janë xhepat e Oligarkëve dhe Klientëve të tij

Qeveria dhe të gjithë faktorët përgjegjës duhet të rishikojnë urgjentisht buxhetin dhe të përcaktojnë prioritetet për të mbështetur këtë kategori të rëndësishme të qytetarëve. Pa mbështetje financiare dhe institucionale, do të mbetemi të papërgjegjshëm ndaj nevojave të tyre dhe do të dështojmë në krijimin e një shoqërie që është vërtet e drejtë dhe përfshirëse për të gjithë.

Le të angazhohemi, si shoqëri, për të garantuar se ata që përballen me aftësi të kufizuara do të kenë mundësitë që meritojnë, dhe se askush nuk do ti lërë pas dore. Ky është momenti për të vepruar dhe për të siguruar një të ardhme më të drejtë për ta.

Partia e Lirisë me programin e saj të mirëmenduar dhe mëse të realizueshëm me 5 prioritete për 4 milionë shqiptarë plus, ka një fokus të vecantë për personat me aftesi të kufizuara dhe në kundërshtim absolut me buxhetin qesharak të Qeverisë në mbështetje të tyre, Partia Lirisë propozoi në 1 nga Amendamentet e saj shtesë fondi prej 5.6 miliardë lekë për përkujdesin social, të papunët dhe personat me aftësi të kufizuar.

Është koha që kjo Narkoqeveri të marri nga të gjithë ne përgjigjen që meriton.