Rinovimi i Shpendit, Cesena tani e vlerëson 15 milionë euro, Anglia destinacioni më i mundshëm
Nga OraNews Përditësimi i fundit 5 Dhjetor 2024, 11:30
Me rinovimin e kontratës deri në qershor të vitit 2028, Cristian Shpendi ka konfirmuar angazhimin e tij me Cesena-n të paktën deri në fund të sezonit aktual, duke shuar çdo spekulim për një largim të mundshëm në merkaton e janarit.
Sipas marrëveshjes, largimi i tij në këtë periudhë nuk do të ndodhë.
Sezoni i ardhshëm, megjithatë, pritet të sjellë ndryshime. Klubi italian, sipas ‘Tuttosport’, nuk ka në plan të pengojë zhvillimin e Shpendit, i cili u ble në vitin 2019 për vetëm 2,500 euro dhe tani vlerësohet rreth 15 milionë euro.
Përveç klubeve italiane të Serisë A, ekzistojnë edhe mundësi jashtë vendit, me Anglinë si destinacion të mundshëm.
Premier League dhe Championship
Për një lojtar të ri si Shpendi, transferimi në Angli, qoftë në Premier League apo në Championship, mund të jetë një hap i madh përpara, jo vetëm në aspektin profesional, por edhe në atë ekonomik. Championship-i ofron mundësi më të mëdha financiare dhe infrastruktura më të zhvilluara krahasuar me Serinë B italiane.
Ky përparim mund ta vendosë Shpendin në një skenë më të madhe ndërkombëtare, duke i dhënë atij mundësinë për të rritur vlerën dhe përvojën e tij si futbollist.
