VIDEO/ Të përjashtuar dhe jo, deputetët e opozitës kërkojnë të futen në Kuvend, ndalohen nga Garda
Nga OraNews Përditësimi i fundit 31 Tetor 2024, 10:16
Kuvendi i Shqipërisë është mbledhur këtë të enjte në seancë plenare, ndërsa deputetët e opozitës kanë mbërritur në oborrin e Kuvendit pak minuta pas nisjes së seancës.
Të përjashtuar dhe jo, deputetët e opozitës kërkojnë të futen në Kuvend, por ndalohen nga Garda
Ndërkaq demokratët kërkojnë të futen me çdo mënyrë dhe janë shtyrë me efektivët e Gardës, të cilët të ndihmuar edhe nga gardhi metalik, i kanë penguar ata të realizojnë qëllimin e tyre.
Seanca plenare ka nisur në orë 10:00 nën drejtimin e kryetares së Kuvendit Elisa Spiropali.
Pas leximit të rendit të ditës, seanca i nisi punimet me betimin dy deputetëve të rinj, demokratit Andrea Mano i cili zë vendin e Ervin Salianjit, i cili ndodhet në burg prej rreth një muaji.
Ndërsa në vendin e socialistit Jurgis Çyrbja u ul deputeti Ervin Meka.
Pas miratimit të procesverbalit të seancës plenarë të datës 28 tetor 2024, do të diskutohet projektligji “Për shkencën dhe kërkimin shkencor në Republikën e Shqipërisë”.
Në rend dite është parashikuar diskutimi për projektligjin “Për disa ndryshime dhe shtesa në ligjin “Për shërbimin e kërkim-shpëtimit në Republikën e Shqipërisë” si dhe projektligji për një ndryshim në ligjin, “Për fondin kullosor”, i ndryshuar.
Gjatë seancës plenare do të diskutohet edhe dekreti i kthyer nga presidenti Bajram Begaj, për ligjin “Për inspektimin në Republikën e Shqipërisë”.
Po ashtu në rend dite është edhe projektvendimi “Për zgjatjen e afatit të Komisionit Hetimor “Për Shërbimet Publike të Sterilizimit dhe të Check-up-it në Shëndetësi” si dhe projektvendimi “Për miratimin e strukturës, organikës dhe klasifikimin e pagave të personelit me kohë jo të plotë pune të Komisionit Qendror të Zgjedhjeve”.
