SKANDALI I MBETJEVE TOKSIKE/ Balluku: Mos e ktheni një çështje proceduriale në çështje ndërkombëtare. Ja roli i Portit të Durrësit, mos e bëni pis
Nga OraNews Përditësimi i fundit 28 Gusht 2024, 12:09
Çështja e eksportit të një sasie mbetjesh industriale nga porti i Durrësit, që dyshohet se përmbajnë lëndë të dëmshme helmuese, është kthyer në një histori dyshimesh të shumta, me shumë të panjohura.
Një hetim i dyfishtë është duke u kryer nga prokuroria e Durrësit në Shqipëri dhe nga zyra e Bashkimit Evropian kundër Mashtrimeve, OLAF, në Bruksel, mbi 100 kontejnerë të bllokuar së fundmi në Singapor, me origjinë nga porti i Durrësit.
Organizata jo qeveritare amerikane ‘Rrjeti i Aksionit të Bazelit’ i tha Zërit të Amerikës, se ajo është e bindur se porti i Durrësit, jo vetëm në këtë rast, por edhe në raste të tjera më parë është shfrytëzuar për të nxjerrë nga Shqipëria, rajoni dhe me gjasë edhe nga vende të tjera evropiane, mbetje të rrezikshme helmuese drejt disa vendeve aziatike.
Lidhur me këtë çështje ka reaguar Zëvendëskryeministrja dhe Ministre e Infrastrukturës Belinda Balluku, e cila ia heq përgjegjësinë e Autoritetit Portual të Durrësit në lidhje me daljen e 816 ton mbetje të dyshuara toksike nga Porti i Durrësit me destinacion Tajlandën.
Në daljen e saj për median pas mbledhjes së qeverisë, zv/kryeministrja dhe ministrja e infrastrukturës ia faturoi përgjegjësinë Kurum, shoqërisë transportuese por dhe koncesionarit europian nga ka dalë ngarkesa.
Ndërsa këmbënguli që të priten rezultatet e hetimit për të dalë me një konkluzion të saktë se i kujt është faji.
Në një deklaratë për shtyp, pas mbledhjes së Këshillit të Ministrave, Balluku deklaroi se Autoriteti Portual i Durrësit nuk ka lidhje me transportin e mbetjeve të rrezikshme drejt Tajlandës. Ajo kërkoi të mos spekulohet në medie, por t’i lihet çështja drejtësisë.
“Do t’i bëja thirrje mediave që të tregohen të kujdesshme tek analizojnë këtë çështje. Do ta konsideroja të komplikuar nga ana juridike. Ndikojnë negativisht në imazhin e Shqipërisë, do të ishte e udhës që të prisnim vendimet që do të dalin proceset që kanë nisur për këtë çështje mjedisore, që afekton imazhin e Shqipërisë”, theksoi ajo.
Sipas Ballukut, çështja e mbetjeve dhe porti i Durrësit janë dy gjëra të ndryshme
“Kam vënë re që përfshihen ministritë apo Autoriteti Portual. Transporti i mbetjeve të rrezikshme ka filluar në ’98, kjo është për t’ju dhënë fakte që ka një protokoll të mirëfilltë për të cilin Ministria e Mjedisit ka dhënë detaje. Nuk është asgjë e re, ka edhe tranzitim dhe eksport të mbetjeve që janë të koduara në bazë të kodeve evropiane. Ka qenë procedurë normale deri kur mori këtë përmasë, por duhet thënë se Autoriteti Portual s’ka asnjë lidhje me këtë proces. Autoriteti Portual me koncesionarin që ka kryer këtë transport janë dy entitete konkurrente. Do të ndalja këtu informacionin për këtë çështje pasi qeveria dhe instancat janë angazhuar që ditën e parë në bashkëpunim me OLAF, dhe do të kërkoja që secili t’i jepte kohën e duhur drejtësisë dhe më pas të flasim. Të mos e kthejmë këtë çështje procedurale në një çështje kombëtare dhe ndërkombëtare që godet Shqipërinë në këtë sezon turistik”, tha Balluku.
Zv/kryeministrja theksoi se kompania koncesionare ka marrë këtë shërbim në Portin e Durrësit që në kohën kur PD ishte në pushtet dhe është kompani e një vendi të BE-së.
