Aksident i katërfishtë: 10 viktima dhe rreth 40 të plagosur në Turqi, autobusi u përplas me 3 makina
Nga OraNews Përditësimi i fundit 27 Maj 2024, 13:09
Të paktën 10 persona kanë humbur jetën dhe rreht 40 të tjerë kanë mbetur të plagosur pas një aksidenti të shumfishtë në Turqi.
Një autobus dhe tre automjete janë përplasur pasditen e së dielës përgjatë një autostrade në qytetin Mersin. Shkak dyshohet se ka qenë humbja e kontrollit nga drejtuesi i autobusit.
Teksa po udhëtonte drejt Stambollit, mjeti me pasagjerë ka thyer barrierat ndarëse prej çeliku duke hyrë në korsinë e krahut të kundërt dhe duke përplasur fillimisht njërin nga automjetet, pastaj dy të tjerët zinxhirë. Njëra prej makinave ka qenë kamion.
Pamjet nga vendngjarja tregojnë se automjetet e vogla janë shkatërruar thuajse plotësisht, ndërsa autoritetet kanë nisur menjëherë hetimet për të zbuluar shkaqet.
Sipas raportimeve, kanë qenë kalimtarët ata që kanë njoftuar policinë e më pas autoambulancat dhe zjarrfikëset kanë bërë të mundur nxjerrjen e trupave nga rrënojat e mjeteve dhe I kanë dërguar drejt spitalit.
Në një reagim në X, Presidenti turk Recep Tayyip Erdogan ka përcjellë ngushëllimet për familjet e viktimave dhe ka uruar shërim të shpejtë për të plagosurit.
