Anija “Lissus” shpëton nga mbytja 36 emigrantë në Detin Egje
Nga OraNews Përditësimi i fundit 2 Maj 2024, 13:52
Anija ”Lissus” shpëtoi 36 emigrantë, mes tyre edhe fëmijë, me kombësi të ndryshme, që rrezikonin të mbyteshin.
Lajmi bëhet me dije nga Forca Detare Shqiptare, e cila shprehet se gjatë orëve të para të mëngjesit të djeshëm, anija “Lissus”, e cila ndodhet në mision në Detin Egje, ndihmoi në finalizimin me sukses të operacionit të kërkim-shpëtimit në Detin Egje.
Operacioni u zhvillua për t’i dhënë ndihmë emigrantëve të paligjshëm të cilët lundronin në kushte të vështira lundrimi dhe rrezikonin të mbyteshin.
Mjeti i tipit gomone me emigrantë ishin nisur nga Turqia me destinacion Greqinë.
Pas koordinimit të anijes “Lissus” me Rojat Bregdetare të Greqisë dhe Turqisë, u bë i mundur shpëtimi i 36 emigrantëve, mes tyre edhe fëmijë, me kombësi nga Sudani, Liberia dhe Jemeni.
Emigrantët, 18 meshkuj, 14 femra dhe 4 fëmijë në gjendje të mirë shëndetësore, u morën nga Roja Bregdetare Turke për vazhdimin e procedurave të mëtejshme.
“Roja bregdetare vazhdon misionin e saj fisnik në shpëtimin e jetëve njerëzore, në kuadër të Aleancës”, shprehet Forca Detare.
