GJKKO refuzon të lirojë nga qelia Bledar Berberin dhe Ligor Romançkën. SPAK i akuzon për 3 vrasje
Nga Ora News Përditësimi i fundit 13 Mars 2024, 13:41
Ligor Romançka dhe Bledar Berberi
Bledar Berberi dhe Ligor Romançka, dy të arrestuar si të dyshuar në vrasjen e Fridman Xhaferaj në Korçë, Albi Bashaliut në Peqin dhe Çajup Selimit në Tepelenë, do vijojnë të qëndrojnë në masën e sigurisë “arrest në burg”.
Ky ka qenë vendimi i një dite më parë i dhënë nga Gjykata e Posaçme Kundër Korrupsionit dhe Krimit të Organizuar, e cila vendosi të rrëzojë kërkesën e dy personave të arrestuar, të cilët pretendonin për zbutjen e masës së sigurisë nga “arrest në burg” në “arrest shtëpie”.
Kërkesa e tyre është trajtuar nga gjyqtari Erion Bani, i cili pasi dëgjoi avokatët mbrojtës dhe prokurorin e çështjes, vendosi të rrëzojë kërkesat për ndryshimin e masës së sigurisë për Berberin dhe Ligor Romançkën.
Sipas bashkëpunëtorit të prokurorisë Marjus alias Artan Tafani, Bledar Berberi, ka marrë pjesë në vrasjen e Fridman Xhaferaj në Korçë dhe Albi Bashaliut në Peqin.
Ndërsa Ligor Romançka, që në Korçë njihet me nofkën “Golja”, ka marrë pjesë në vrasjen e Xhaferaj dhe Çejup Selimit në Tepelenë.
Në të dyja rastet “Golja” i Korçës, ka vepruar në bashkëpunim dhe sinkronizim me Laert Haxhiun, Artan Tafanin, Erisiano Abedini, Lulzim Spahinë alias Arapi, Bujar Abedinin nga Tepelena, Mariglen Topuzin nga Pogradeci, Bledar Berberin vëllain e “Koros” dhe Idriz Manej.
Kurse Bledar Berberi, është vëllai i Meardi Berberit i njohur në Pogradec me nofkën “Koro”.
Berberi mban lidhje të forta me Laert Haxhiun, Ilir Berberin alias “Lili i Rrushkës” aktualisht në burg dhe djalin e këtij të fundit Firdeus Berberi i arrestuar në Greqi pasi u shpall në kërkim për “Vrasje me dashje” të mbetur në tentativë ndaj Johan Muçllarit dhe “Mbajtjes pa lejë të armëve”.
Ligor Romançka dhe Bledar Berberi
