“Shtëpia e 100 banorëve”/ Holandë, komuniteti i kënaqur me jetën kolektive
Nga Katerina Hysenllari Përditësimi i fundit 13 Shkurt 2024, 15:43
A e keni menduar ndonjëherë të jetoni në mënyrë kolektive edhe me persona të panjohur? Në Holandë, kjo nuk është aspak e çuditshme. Ja se si nisi ideja dhe se si funksionon komuniteti atje.
Kjo është mënyra se si 100 njerëz ndajnë një shtëpi të vetme në Holandë!
E njohur me emrin Central Wonen në qytetin Delft komunitetit që jeton këtu iu deshën gjashtë vjet për të bindur autoritetet holandeze se ajo që u nis thjesht si një ide ishte më shumë se një ëndërr.
Katër dekada më vonë, ajo është ende funksionale. Në korrik 1969, historia e Lies van den Donk-Dooremaal, një mësuese dhe nënë e katër fëmijëve, u publikua në gazetën progresive De Nieuwe Linie.
Ajo sfidoi arkitektët që të krijonin një dizajn strehimi që do t'u mundësonte grave të punonin si dhe të drejtonin një familje.
Duke qenë se gratë prireshin të bënin të njëjtat detyra shtëpiake, argumentoi ajo, sigurisht që zgjidhja ishte krijimi i kolektivëve.
Artikulli frymëzoi një lëvizje bazë në të gjithë Holandën. Central Wonen e parë u hap në Hilversum në 1977; sot ka më shumë se 70 komunitete në mbarë vendin.
Të gjitha njësitë kualifikohen si banesa sociale, për të cilat kufiri i të ardhurave është vendosur nga qeveria në 47,699 € për një person të vetëm dhe 52,671 € për një familje me shumë persona.
Gjithnjë e më shumë, banorët po qëndrojnë për një kohë të gjatë në to.
Holanda po përjeton një krizë strehimi, e madje mungesa e shtëpive të përballueshme ishte një temë e nxehtë në zgjedhjet e përgjithshme të vitit 2023.
Ndërsa një e treta e banorëve largohen nga Central Wonen Delft pas një viti, dy të tretat qëndrojnë më gjatë, me shumë prej tyre që festojnë një dekadë banimi atje.
