“Gërdeci” shtyhet sërish, SPAK kërkon dëshminë e Mediut dhe ish-sekretares së Bumçit në 21 shkurt
Nga Edison Vatnikaj Përditësimi i fundit 7 Shkurt 2024, 09:58
U mbajt këtë të martë në Gjykatën e Posaçme seanca e radhës ndaj ish-ministrit të Mbrojtjes Fatmir Mediu, lidhur me çështjen e Gërdecit.
Në përfundim u vendos që seanca të shtyhet dhe ajo e radhës të mbahet më 21 shkurt, dhe dëshmitari i fundit Ilmi Laçaj refuzoi të jepte deklarime.
Prokurorët e SPAK kërkojnë të pyetet edhe Fatmir Mediu në seancën e 21 shkurtit.
Po ashtu, SPAK i kërkoi gjykatës të gjendet Anjola Agolli sektretare e ish-ministrit të Drejtësisë Aldo Bumçi, me pretendimin se nga zyra e saj ka dalë dhe shkresa për djalin e ish-kryeministrit Sali Berisha, Shkëlzen Berisha.
Agolli nuk është gjetur megjithëse SPAK ka vënë më dispozicion një adresë të re të saj.
Ndërkohë u përsërit thirrja për të bashkëpandehurit e tjerë, mes tyre Luan Hoxha, Dritan Minxolli dhe Mihal Delijorgji, të cilët nuk janë gjetur në adresat e deritanishme të çuara në gjykata.
Gjykata informoi se Ministria e Drejtësisë ka dërguar letër-porosinë në SHBA për të marrë në pyetje Patrick Henry dhe përfaqësuesit e kompanisë SAK.
Prokurori i SPAK kërkoi në seancën e radhës se nëse do të jetë gati mund të pyetet edhe Mediu në cilësinë e të pandehurit.
Ky i fundit tha për mediat se për këtë çështje do të komunikonte me avokatët.
Ndërkaq në përfundim të seancës vetë ish-ministri Mediu u shpreh i hapur për hetimet dhe i bëri thirrje që të vijnë të dëshmojnë personat e kërkuar në proces.
