"Transmodulari"/ Krimi ekonomik dhe kibernetik bëjnë goditje! Ndalohen 3 shtetas, procedohen 7 të tjerë

Nga OraNews Përditësimi i fundit 13 Janar 2024, 12:17

Policia e shtetit ka finalizuar një operacion policor të koduar “Transmodulari”. Seksioni për krimin ekonomik në bashkëpunim me atë kibernetik vunë në pranga 3 shtetas dhe proceduan 7 të tjerë, të gjithë banues në Tiranë.

Këta shtetas tregtonin në ambjentet e tyre tregtare, aparatura dekoder që transmetojnë kanale televizive vendase dhe të huaja për të cilat kërkohet pagesë specifike nga platforma të licensuara zyrtare.

Gjatë kontrolleve në ambjentet e tyre tregtare policia seksuestroi 200 aparate dekodera, të modeleve të ndryshme tokësore dhe satelitore dhe transmodularin që bënte kontrollin e të gjitha IP-ve të shpërndara pas shitjes së dekoderave.

Njoftimi i Policisë Tiranë

Finalizohet operacioni policor i koduar “Transmodulari”.

Operacioni u zhvillua nga Seksioni për Hetimin e Krimit Ekonomik e Financiar, në bashkëpunim me Sektorin per Hetimin e Krimeve Kibernetike dhe Sektorin e Forcës së Posaçme të Operacioneve Speciale dhe Kërkimit, në DVP Tiranë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë.

Tregtonin aparatura dekoder që transmetojnë kanaleve televizive vendase dhe të huaja, për të cilët kërkohet pagesë specifike nga platforma të licensuara zyrtare, vihen në pranga 3 shtetas.

Procedohen penalisht 7 të tjerë, dhe shpallet në kërkim një tjetër.

Sekuestrohen në cilësinë e provës materiale 200 aparatura dekoder.

Specialistët e Seksionit për Hetimin e Krimit Ekonomik e Financiar, në bashkëpunim me Sektorin per Hetimin e Krimeve Kibernetike dhe Sektorin e Forcës së Posaçme të Operacioneve Speciale dhe Kërkimit, në DVP Tiranë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, pas një pune të mirëfilltë hetimore disamujore finalizuan operacionin policor të koduar “Transmodulari”.

Si rezultat i tij u bë ndalimi i shtetasve:

– F. L., 55 vjeç, A. M., 50 vjeç, dhe E. B., 70 vjeçe, të tre banues në Tiranë.

Gjithashtu u proceduan penalisht shtetasit E. S., 21 vjeçe, E. Hj., 35 vjeç, A. Gj., 43 vjeçe, D. M., 23 vjeçe, G. D., 33 vjeç, G. P., 26 vjeçe, E. T., 21 vjeçe, të gjithë banues në Tiranë, dhe u shpall në kërkim shtetasi J. V., 30 vjeç, banues në Tiranë.

Nga veprimet hetimore të kryera ka rezultuar se këta shtetas, tregtonin në subjektet e tyre tregtare, aparatura dekoder që transmetojnë kanaleve televizive vendase dhe të huaja, dhe për të cilët kërkohet pagesë specifike nga platforma të licensuara zyrtare.

Gjatë kontrolleve të ushtruara në këto subjekte, u gjetën 200 aparate dekoderash, të modeleve të ndryshme tokësore dhe satelitore, dhe transmodulari që bënte kontrollin e të gjitha IP-ve të shpërndara pas shitjes së dekoderave, me listën e kanaleve specifike, si dhe gjithashtu bënte gjurmimin në kohë reale të kanaleve, nëpër subjektet e shpërndara.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.