Ra pa ndjenja në fushën e lojës, zbulohet gjendja e futbollistit 29-vjeçar
Nga OraNews Përditësimi i fundit 16 Dhjetor 2023, 20:51
Momente paniku në duelin e Premier Ligës, mes Burnemuth dhe Luton, teksa sfida u ndërpre në minutën e 66’, pasi kapiteni i Luton, Tom Lokier përsoi një kolaps kardiak duke u rrëzuar pa ndjenja në fushën e lojës.
Mbrojtësi 29-vjeçar humbi ndjenjat në fushën e lojës, ndërsa u desh ndërhyrja e menjëhershme e stafeve mjekësore, për të shpëtuar lojtarin.
Sipas raportimeve të medieve britanike, futbollisti tashmë është zgjuar dhe është mirë, por si masë paraprake po zhvillon të gjitha kontrollet e nevojshme.
Lokier kishte përjetuar një episod të ngjashëm gjatë finales së playoff-it të Championship-it më 27 maj, ndërsa pas atij momenti iu nënshtrua edhe një operacioni në zemër.
Ai mori OK-in nga mjekët për të vijuar futbollin, megjithatë mbrëmjen e kësaj të shtune mbrojtësi kaloi sërish momente paniku.
