Atentat ndaj kushëririt të Ardian Nikulajt, policia njoftim zyrtar: Janë ngritur pika kontrolli në të gjitha akset rrugore
Nga OraNews Përditësimi i fundit 2 Dhjetor 2023, 22:17
Një atentat i mirë organizuar ka ndodhur mbrëmjen e sotme ndaj Entjan Nikulajt në dalje të Lezhës, pranë aksit që lidh qytetin me Laçin.
Mësohet se ndaj kushëririt të biznesmenit të vrarë në prill të këtij viti, Ardian Nikulaj, është qëlluar me breshëri kallashnikovi nga autorë ende të paidentifikuar, të cilët i kishin bërë pritë.
Sakaq, raportohet se Eno Nikulaj, i cili u qëllua teksa ishte brenda në makinë, është në gjendje kritike për jetën në spital.
Autorët janë larguar në drejtim të Kurbinit pasi kanë qëlluar ndaj 40-vjeçarit, ndërsa policia ka ngritur postblloqe në rrugët përreth.
Njoftimi i policisë Lezhë:
Lezhë/Informacion paraprak
Rreth orës 21:30, në aksin rrugor “Lezhë-Shkodër”, në vendin e quajtur “Ura e trenit”, në rrethana ende të paqarta, është qëlluar me armë zjarri në drejtim të automjetit që drejtohej nga shtetasi E. N., 40 vjeç, banues në Shëngjin.
Si pasojë është plagosur shtetasi E. N., i cili është transportuar në gjendje shumë të rëndë, në spitalin e Lezhës, për ndihmë mjekësore.
Për këtë ngjarje është ngritur menjëherë një grup i posaçëm hetimor, si dhe janë ngritur pika kontrolli në të gjitha akset rrugore.
Ndërkohë, vijon intensivisht kontrolli i zonës.
