Dëmtoi xhamat e një lokali, arrestohet 32-vjeçari në Elbasan, policia i gjen fara kanabisi në banesë
Nga OraNews Përditësimi i fundit 18 Nëntor 2023, 10:14
Një 32 vjeçar u arrestua pasi dëmtoi me mjete të forta xhamat e një lokali në Elbasan. Gjatë kontrollit në banesën e 32 vjeçarit policia gjeti dhe sekuestroi një sasi farash kanabisi.
Njoftimi i policisë Elbasan:
Dëmtoi me mjete të forta xhamat e një lokali, për motive të dobëta, identifikohet, kapet dhe vihet në pranga 32-vjeçari.
Sekuestrohet një sasi farash kanabisi, që u gjet gjatë kontrollit në banesën e 32-vjeçarit.
Specialistët për Hetimin e Krimeve të Komisariatit të Policisë Elbasan, menjëherë pas marrjes së njoftimit se në fshatin Shushicë ishin thyer me sende të forta xhamat e një lokali, kanë organizuar punën për identifikimin dhe vënien përpara përgjegjësisë ligjore të autorit të këtij rasti.
Si rezultat i veprimeve operacionale dhe hetimore rezultoi se shtetasi K. M., 32 vjeç, banues në fshatin Shushicë, për motive të dobëta, kishte dëmtuar me sende të forta xhamat e një lokali në këtë fshat, në pronësi të shtetasit G. M., 31 vjeç.
Policia, gjatë kontrollit në banesën e 32-vjeçarit, gjeti dhe sekuestroi një sasi farash të dyshuara narkotike cannabis sativa.
Në përfundim të veprimeve procedurale, u arrestua në flagrancë shtetasi K. M., 32 vjeç, banues në fshatin Shushicë, për veprat penale "Shkatërrimi i pronës" dhe "Prodhimi dhe shitja e narkotikëve".
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
