Protestat në Izrael rindizen në prag të vendimit të gjykatës për reformën në drejtësi
Nga OraNews Përditësimi i fundit 11 Shtator 2023, 20:50
Protestat në Izrael kanë rifilluar një ditë përpara seancës gjyqësore të pritur me padurim lidhur me planet e diskutueshme të qeverisë për reformën në drejtësi.
Disa qindra demonstrues u mblodhën para shtëpisë së ministrit të Drejtësisë, Yariv Levin në Modiin sot në mëngjes.
Mësohet se ka pasur konfrontime me policinë. Në mbrëmje ishte planifikuar një tubim i madh në Jeruzalem para Gjykatës së Lartë.
Të martën, të 15 gjyqtarët e gjykatës do të takohen për herë të parë për të diskutuar peticionet kundër ligjit të miratuar së fundmi, pjesë e një projektligji gjithëpërfshirës nga qeveria fetare e krahut të djathtë për të dobësuar gjyqësorin.
Pritet që diskutimet të zgjasin disa javë. Nëse gjykata kundërshton ligjin dhe qeveria nuk e pranon vendimin, vendi mund të zhytet në një krizë shtetërore.
Bisedimet për një kompromis me opozitën e udhëhequr nga presidenti Isaac Herzog deri më tani kanë qenë të pasuksesshme.
Disa media izraelite raportuan sot se kryeministri Benjamin Netanyahu po bën përpjekje për dobësimin e njëanshëm të ligjit, pa miratimin e opozitës.
Megjithatë, mbetet e paqartë nëse ai do të marrë mbështetje të mjaftueshme për këtë brenda koalicionit të tij.
