Zgjedhjet në Kukës/ Berisha: Do të mbrojmë votën e lirë, nuk do tërhiqemi nga beteja, Basha si Rama
Nga OraNews Përditësimi i fundit 25 Gusht 2023, 13:04
Ish-kryeministri Sali Berisha në një konferencë për mediat, foli për zgjedhjet në Bashkinë e Kukësit, të cilat do të mbahen më 24 shtator.
Berisha u shpreh se PD do të bëjë gjithçka për të mbrojtur votën e lirë dhe të bindë sa më shumë qytetarë të marrin pjesë në zgjedhje. Më tej, ish-kryeministri u shpreh se nuk do të tërhqiet nga beteja politike.
“Është e vërtetë se janë bërë përpjekje dhe më parë, pse nuk arritëm në një rast, nuk do të thotë të mos e provosh sërish. Populli do ngrihet në këmbë për tu ndarë nga ky regjim. Nuk tërhiqemi nga beteja dhe do bëjmë gjithçka për një betejë të fuqishme. Ne do të marrim pjesë në zgjedhje, e do mbrojmë votën me procedurat që kemi deklaruar. Nuk e mbrojmë me armë”, u shpreh Berisha.
Ndërsa në lidhje me situatën brenda PD-së, ish-kryeministri tha se vula është e PD-së, ndërsa bëri thirrje sërish për protesta.
“Vula është e PD, është akt kriminal i Edi Rama dhe të gjithë shqiptarët e dinë, ne vazhdojmë betejën. Ne jemi në betejë. Opozita duhet të ngrihet në një protestë të fuqishme të qëndrueshme. Sepse me këtë regjim nuk ka asnjë të ardhme, dhe ky regjim nuk ikën kurrë me votë, por vetëm me protestë. Rama është kryeministri më i lidhur me krimin dhe duhet të bëjmë gjithçka që t’i japim vendin që meritojnë”, përfundoi Berisha.
