PD kundër shtyrjes së koncesionit të markimit të karburanteve
Nga OraNews Përditësimi i fundit 15 Gusht 2023, 17:25
Sekretari i grupit parlamentar të Partisë Demokratike, Arbi Agalliu u shpreh sot se “PD është qartësisht kundër vendimit të qeverisë për të shtyrë koncesionin e markimit të karburanteve, pasi ka dështuar tërësisht në përpjekjen për të luftuar kontrabandën”.
“Për PD-në, kjo është një aferë që bie në kurrizin e konsumatorëve që gjatë gjithë këtyre viteve kanë paguar përmes çmimit të rritur të karburantit. Normalisht kontrata e koncensionarit të markimit duhet të përfundonte më 1 gusht 2023, por edhe pas kësaj date kompanitë kanë vijuar të paguajnë, përndryshe nuk u bëhej zhdoganimi”, deklaroi Agalliu përmes një deklarate për shtyp.
Sipas tij, “shpjegimi që ka dhënë koncesionari për shtyrje lidhet me mosmarkimin e naftës bruto, e cila sipas tyre, është e pamundur që të kryhet nga operatorët e tregut”.
“Shoqata e Shoqërive të Hidrokarbureve ka qenë kundër kësaj shtyrje. Madje shoqatat kanë kërkuar shpjegime nga institucionet përse duhet të shtyhet afati i markimit. Gjë për të cilën ata nuk kanë marrë asnjë përgjigje zyrtare. Sipas tyre ky koncesion nuk ka dhënë rezultate për të luftuar kontrabandën, pasi preket nafta që del në treg dhe ajo që nuk paguan akcizë”, theksoi ai.
Agalliu theksoi se “gati për 9 vite janë marrë në çmimin e naftës 30 milionë euro”.
“Tarifën e markimit e kanë paguar konsumatorët pasi në çdo litër naftë qytetarëve u merret 1 lek për litër. Për Partinë Demokratike është e qartë se shtyrja e tij edhe për një vit do të rëndojë në çmimin e naftës ku do të merren 7-8 milionë euro të tjera nga xhepat qytetarëve. Ja pra pse kemi çmimet më të larta në rajon, sepse për çdo litër naftë rreth 130 lekë shkojnë vetëm taksa”, theksoi ai.
Sipas tij, “PD ka bërë dhe bën thirrje për uljen e barrës fiskale apo taksave që ngarkojnë dhe rrisin artificialisht çmimet e produkteve dhe shërbimeve bazë”.
“Tregu vetëfunksionon nëse lihet i lirë dhe në konkurrencë, por fatkeqësisht në Shqipëri ndodh e kundërta. PD do të vijojë denoncimet publikisht dhe në organet përkatëse për çdo rast abuzimi, vjedhje dhe korrupsioni”, shtoi ai.
