Dirigjenti Zubin Mehta dhe Orkestra Filharmonike e Beogradit, së shpejti në Tiranë

Nga OraNews Përditësimi i fundit 8 Qershor 2023, 09:12

Agjenda artistike e Teatrit Kombëtar të Operas dhe Baletit parashikon në datën 22 qershor ngjarjen artistike me pjesëmarrjen e artistëve të famshëm.

Kështu, një nga dirigjentët më të famshëm në nivel ndërkombëtar do të vijë në Tiranë për të drejtuar një koncert gala. Zubin Mehta, tashmë 87-vjeçar por ende me një aktivitet të ngjeshur artistik, do të zbresë në kryeqytetin shqiptar së bashku me Orkestrën Filharmonike të Beogradit.

Kjo është hera e parë që dirigjenti me famë ndërkombëtare vjen në Shqipëri, por publiku shqiptar e njeh përmes dirigjimit të Koncertit të Vjenës si dhe bashkëpunimit me tre tenorët: Pavarotti, Domingo e Carreras.

Zubin Mehta është bërë i famshëm për ekspresivitetin në podium si dhe për interpretimin që i bën repertorit operistik.

Titujt që mban Zubin Mehta janë të shumtë. Karriera e tij mori hov që kur drejtoi Filharmoninë Mbretërore të Liverpulit, në moshën 21-vjeçare dhe më pas filloi të zëvendësonte gjithë dirigjentët më me emër.

Ai u bë dirigjenti më i ri që ka drejtuar ndonjëherë një orkestër filharmonike në Amerikën e Veriut. Që prej vitit 1981 ai mban titullin “dirigjent i përjetshëm” nga Orkestra Filharmonike e Izraelit. Tituj të tillë si “dirigjent nderi” i janë dhënë Zubin Mehtas nga orkestrat e të gjithë kontinenteve.

Galaja e 22 qershorit vjen në kuadër të “Ballkanit të hapur” dhe lidhet me festimet e 100-vjetorit të Orkestrës Filharmonike të Beogradit./ATSH/