Vrasja në 2005, gjurmë në Malin e Zi, GJKKO kërkon të pyes personin që përgatiti bombën ndaj Lamajt
Nga Edison Vatnikaj Përditësimi i fundit 29 Maj 2023, 17:29
Dy dëshmi të reja janë administruar nga grupi i hetimit të cilët kanë të bëjnë më vrasjen e Klodian Saliut dhe Vajdin Lamës në vitin 2005. Në gjykatë u paraqitën nëna e personit që ishte në makinë me Klodian Saliun në momentin që iu zhvillua atentati si dhe motra e Lulzim Berishës. Një tjetër vendim u mor për të kërkuar ndihmë nga Mali i Zi, ku qëndron personi i cili realizoi bombën.
Dëshmia e Luftar Reçit për vrasjen e Vajdin Lamajt ka shërbyer që që GJKKO të kërkojë ndihmë nga Mali i Zi.
Përmes një letërporosie është kërkuar marrja në pyetje e shtetasit Joshko Çervenkovski, personi që sipas Reçit ka përgatitur bombën me të cilën u vra biznesmeni në vitin 2005.
Vendimi është bërë i ditur në seancën e kësaj të hëne kur nën akuzë është e ashtuquajtura banda e Durrësit.
Para togave të zeza u paraqitën 5 dëshmitarë, për të folur mbi atentatin që iu bë Klodian Saliut, ngjarje e ndodhur vetëm një ditë para vrasjes së Lamajt, për të cilën akuzohet i njëjti grupim.
Mes tyre ishte dhe nëna e Osman Trumës, personit që udhëtonte në makinë me Klodian Saliun në momentin kur iu bë atentat.
Nëna e Osman Trumës: Në 2005, djali im kishte ardhur për pak ditë pushime në Shqipëri. Me KLodian Saliun ishin shokë fëmijërie të një lagjeje. Kam folur me të çdo ditë në telefon, dhe gjithçka shkonte mirë. Por një ditë mësojmë se kishte mbetur i plagosur gjatë një atentati në autostradën Durrës-Tiranë. Me ç’më ka rrëfyer djali që dole dhe e prita në aeroportin e Romës, nuk I ka njohur autorët. Fillimisht janë qëlluar nga mbrapa dhe më pas anash. Një çift në moshë kanë ndaluar dhe iu kanë dhënë ndihmën e parë, më pas ka mbërritur ambulance”
Pjesë e dëshmisë u bë edhe motra e Lulzim Berishës e tregoi mbi aktivitetin e vëllait të saj dhe rrethanave të ditës kur ndodhi ngjarja.
Edhe një herë ajo është shprehur se i vëllai në dy datat kur kanë ndodhur ngjarjet ishte në Turqi për kurim së bashku me një shokun e tij.
