OSBE denoncon ndalimin e hyrjes në Turqi të dy deputetëve
Nga OraNews Përditësimi i fundit 8 Maj 2023, 18:11
Asambleja Parlamentare e Organizatës për Sigurinë dhe Bashkëpunimin në Evropë (OSBE) denoncoi të hënën refuzimin e Turqisë për t'i dhënë akreditimin dy deputetëve skandinavë që do të shkonin në vend si vëzhgues në zgjedhjet presidenciale të 14 majit.
“Jemi të zhgënjyer nga kjo masë e cila mund të ketë një ndikim negativ në punën e misionit ndërkombëtar vëzhgues”, thuhet në një deklaratë të Kuvendit, i cili dërgon më shumë se 100 deputetë përveç afro 400 përfaqësuesve të dërguar nga vetë organizata.
Turqia nuk duhet të kishte "ndikuar në përbërjen e misionit" bazuar në "deklaratat e bëra" nga parlamentarët "në kontekstin e mandatit të tyre politik", theksohet në deklaratë.
Dy deputetë, danezi Soren Sondergaard dhe parlamentari suedez Kadir Kasirga nuk morën leje nga Ankaraja për këtë udhëtim.
Sodergaard tha se ai akuzohej për "promovim të një organizate terroriste".
Ai kishte vizituar më parë Forcat Demokratike Siriane të dominuara nga kurdët, të cilat janë në ballë të luftës së mbështetur nga SHBA kundër grupit të Shtetit Islamik në Siri.
"Një vend nuk mund të zgjedhë parlamentarët që kanë një mision vëzhgues," tha ai.
"Kjo hedh një hije mbi zgjedhjet turke, (ata) tashmë po tregojnë se duan t'i kontrollojnë ato."
Zgjedhjet presidenciale paralajmërojnë një betejë gjoks më gjoks.
Kandidati i opozitës Kemal Kilicdaroglu përfaqëson sfidën më të vështirë elektorale për Presidentin Rexhep Tajip Erdogan që kur ai erdhi në pushtet në vitin 2002.
Në vitin 2018, Ankaraja tashmë kishte ndaluar hyrjen për dy deputetë, një gjerman dhe një suedez.
Organizata për Siguri dhe Bashkëpunim në Evropë, e cila ka 57 shtete anëtare, u themelua në vitin 1975 në zemër të Luftës së Ftohtë për të nxitur marrëdhëniet midis Lindjes dhe Perëndimit dhe monitorimin e mbarëvajtjes së zgjedhjeve në shtetet anëtare.
