Berisha: Edi Rama armiku i arsimit shqiptar, zotohemi se ju jeni dhe do të mbeteni të parët për ne
Nga OraNews Përditësimi i fundit 9 Prill 2023, 19:45
Nga Elbasani, Sali Berisha u shpreh se me Luçiano Boçin dhe gjithë kandidatët e primareve hapet kapitulli i përfaqësimit politik dinjitoz të qytetarëve.
Ai shtoi se Rama është ai që bëri atë që nuk e bëri asnjë armik dhe pushtues duke shkatërruar arsimin e këtij qyteti, që është djepi i arsmit.
Berisha: Unë paraqes sot këtu, kandidat për qytetar të parë të Elbasanit, një nga bijtë tuaj më të shquar, nënkryetarin e PD-së, drejtuesin e sprovuar të grupit parlamentar, por mbi të gjitha paraqes Luçiano Boçin, kandidatin tuaj, kandidatin që ju e votuar, që ju i besuat. Me 14 maj ne çelim kohën e vendosjes në piedestal të përfaqësimit tuaj, të dinjitetit tuaj. Liria në thelb nuk ka asgjë tjetër më shumë se dinjiteti i një njeriu. Kjo është liria e individit, me Luçiano Boçin dhe gjithë kandidatët e primareve ne hapim kapitullin e përfaqësimit politik dinjitoz, të qytetarëve. Ne zotohemi se ju jeni dhe do të mbeteni, të parët, të parët, për Luçiano Boçin, për kandidatët e primareve në mbarë Shqipërinë.
Ata që studiuan në Elbasan dhe përhapën në të 4 anët e kombit, në të gjitha viset e kombit dritën e dijes dhe shpirtin e atdhetarisë. Në qoftë se do të ringjalleshin dhe mendoni për një moment për Elbasanin e sotëm, do të ishin njerëzit më të zhgënjyer. Do të shihnin tek ne, qenie, do të ju dukeshim të përçudnuar. Do pyesnin ç’ka ndodhur me qytetarët e këtij qyteti të bekuar, ç’ka ndodhur me shqiptarët, si ka mundësi që në djepin e arsimit, vitin e kaluar të preferojnë të vijnë vetëm dy të rinj shqiptarë. Kush tjetërsoi arsimin në këtë mënyrë për shqiptarët. Cili është ai armik, cili është ai pushtues që u bëri shqiptarëve këtë gjë me arsimin e tyre. Përgjigja është 1 dhe vetëm 1: është Edi Rama, është Edi Rama dhe regjimi i tij.
