Berisha: Prania juaj këtu mesazhi më i fuqishëm që Elbasani përcjell për fitoren e Boçit në 14 maj

Nga OraNews Përditësimi i fundit 9 Prill 2023, 19:26

Nga Elbasani me kandidatin e “Bashkë Fitojmë”, Luçiano Boçi për këtë qytet, Sali Berisha tha se prania e elbasanasve aty ishte shenja e fitores në 14 maj.

Ai shtoi se zgjedhjet e 14 majit janë zgjedhjet e jetës, e idealeve dhe se janë zgjedhjet për fatin e Elbasanit, për fatin e Shqipërisë.

Berisha: Entuziazmi, prania juaj këtu është mesazhi më i fuqishëm që Elbasani i përcjell sot, jo vetëm qytetarëve të këtij rrethi, por mbarë shqiptarëve në Shqipëri dhe kudo që janë. Ky është mesazhi i ndryshimit të madh, është mesazhi i pranverës së re të demokracisë, është mesazhi i fitores të pluralizmit politik në Elbasan dhe në Shqipëri. Është mesazhi i fitores së Luçiano Boçit, si qytetari i parë i Elbasanit. Me 14 maj në Elbasan dhe mbarë Shqipërinë, përballet monizmi me idealet e lirisë, përballet monizmi me idealet e pluralizmit, përballet monizmi me dëshpërimin dhe zhgënjimin që mbjell, me shpresën dhe besimin tek Elbasani dhe Shqipëria.

Zgjedhjet e 14 majit janë zgjedhjet e jetës tonë, e idealeve tona, janë zgjedhjet për fatin e Elbasanit, për fatin e Shqipërisë. Kam besim të plotë se Elbasani do të jetë në krye të fitores, në krye të përpjekjes shqiptare për mposhtjen e monizmit, për triumfin e pluralizmit. Elbasanase dhe elbasanas, kurrë mos harroni se në momentet kritike të kombit, ju keni ndarë më mirë, më drejtë se gjithë të tjerët.  Mendja jua, virtytet tuaja, arsimimi, atdhedashuria bënë që Elbasani të jetë qyteti i dritës për mbarë kombin shqiptar.

Elbasani në shekuj, në dekada, rrezatoi në të 4 anët e Shqipërisë, dije, dije, atdhedashurinë, po kaq sa dijen. Është ky qyteti në të cilin u përgatitën mijëra e mijëra të dijes, që ndriçuan mendjen e shqiptarëve me dije, ndriçuan mendjen e shqiptarëve me shqiptarizëm, me atdhedashuri, me dashuri për Elbasanin dhe Shqipërinë.  Është ky qyteti që rrezatoi në të 4 anët e dheut, dije dhe demokraci. Demokracia dhe arsimi, demokracia dhe dija, janë një dhe të pandarë. Është ky qyteti që do të konservonte në shekuj dhe mijëvjeçar, të folmen më të bukur shqiptare, të cilën kombësia e gjuhës, do ta zgjidhte si gjuha zyrtare të shqiptarëve. Është ky qyteti që hodhi themelet, e islamit shqiptar si doktrinë e shqiptarësisë. Elbasani dhe kombi, shpirti i tij, janë një dhe të pandarë. Shqipëria pret nga Elbasani me 14 maj të votohen idealet e lirisë, të votohet pluralizmi, të votohet Luçiano Boçi.