Polonia furnizon Ukrainën me avionë luftarakë MiG-29
Nga OraNews Përditësimi i fundit 4 Prill 2023, 15:34
Polonia i është bashkuar listës së vendeve që dërgon avionë luftarakë MiG-29 në Ukrainë. Më herët një gjë të tillë e kishte bërë Sllovakia, e cila ka ndihmuar Kievin, me 4 avionë.
"Disa MiG-29 janë dërguar tashmë. Ata janë vërtet të dobishëm për Ukrainën, në mbrojtjen e sigurisë sonë kolektive", tha ndihmësi i presidentit polak, Marcin Przydacz.
Muajin e kaluar, Polonia u bë anëtari i parë i NATO-s që premtoi avionët luftarakë për Ukrainën.
Përpara pushtimit të plotë të Rusisë në shkurt të vitit 2022, Ukraina kishte disa dhjetëra MiG-29 që trashëgoi pas rënies së Bashkimit Sovjetik në vitin 1991, por është e paqartë se sa prej tyre mbetën në shërbim pas më shumë se një viti luftimesh.
Forca ajrore e Ukrainës është familjarizuar me MiG-29 dhe mund t'i përdorë avionët menjëherë.
Presidenti ukrainas Volodymyr Zelensky u ka kërkuar vazhdimisht vendeve perëndimore avionë luftarakë, por aleatët e NATO-s janë treguar të përmbajtur, duke përmendur shqetësimin për përshkallëzimin e rolit të aleancës në luftë.
