Xhixho: Qeveria po tallet me bursat e studentëve, të rinjtë të dëmshpërblehen për vonesat 4 deri në 6 muaj
Nga OraNews Përditësimi i fundit 27 Janar 2023, 12:17
Partia e Lirisë akuzon qeverinë se po vijon të tallet me studentët shqiptarë duke zvarritur ende pagesën e bursave për ta.
Nënkryetarja e kësaj partie, Erisa Xhixho, deklaroi kët të premte se bursat sociale dhe ato të ekselencës për studentët vonohen nga 4 deri në 6 muaj, por edhe pse vlera e tyre nuk i kalon 10 mijë lekë të reja, qeveria e shpërfill nevojën dhe meritën e studentëve, duke zvarritur me muaj të tërë disbursimin nga fondi i bursave.
Nisur nga kjo situatë, Xhixho i bëri thirrje qeverisë t'i japë studentëve bursat dhe pagesën që u takon, madje me dëmshpërblimin për vonesat e shkaktuara.
“Të përjashtuar nga të gjitha paketat e rezistencës dhe pseudo “Pakoja e madhe”, qeveria vijon të tallet me studentët, duke zvarritur pagesën e bursave.
Në kulmin e krizës së çmimeve, që ka dyfishuar koston e tyre të jetesës, studentëve shqiptarë nuk u jepet as ajo që me të drejtë u takon.
Bursat sociale dhe ato të ekselencës për studentët vonohen nga 4 deri në 6 muaj. Edhe pse vlera e tyre nuk i kalon 10 mijë lekë të reja, qeveria e shpërfill nevojën dhe meritën e studentëve, duke zvarritur me muaj të tërë disbursimin nga fondi i bursave.
Asgjë më shumë se kjo zvarritje nuk flet për qasjen që kjo qeveri ka për arsimin dhe të rinjtë e këtij vendi.
I bëj thirrje qeverisë t'i japë studentëve bursat dhe pagesën që u takon, madje me dëmshpërblimin për vonesat e shkaktuara.
Kjo është arsyeja pse çdo ditë qindra të rinj marrin rrugët e Europës, shpesh duke rrezikuar edhe jetën.
Një qeveri që përbuz të rinjtë i ka ditët të numëruara!”, deklaroi Xhixho.
