Largimi i plotë i barrikadave, KFOR operacion në veri të Kosovës

Nga Siklajda Shorja Përditësimi i fundit 3 Janar 2023, 12:37

Misioni KFOR në Kosovë po kryen disa operacione inxhinierike në veri të vendit, duke larguar nga rruga automjetet e bllokuara që kanë mbetur. Në një njoftim  të misionit thuhet se kjo po bëhet për të rikthyer lirinë e lëvizjes në përputhje me mandatin e tij të Kombeve të Bashkuara.

KFOR po zhvillon operacione inxhinierike në very të Kosovës për të hequr disa automjete që ende po bllokojnë rrugët atje. Këtë të martë, misioni paqeruajtës i NATO-s në Kosovë njoftoi zhvillimin e këtij operacioni për largimin e plotë të barrikadave të mbetura.

Për 20 ditë me rradhë, në dhjetor të vitit 2022, në katër komunat veriore të banuara me shumicë serbe, u vendosën barrikada në rrugët që qojnë drejt pikave kufitare Kosovë-Serbi.

Barrikadat u vendosën në shenjë pakënaqësie me arrestimin e një ish-polici serb të Kosovës, i cili, sipas autoriteteve të Kosovës, dyshohet për organizimin e një sulmi ndaj zyrave të Komisionit Qendror të Zgjedhjeve në veri.

Por, serbët vendosën të heqin barrikadat pasi Dejan Pantiqit iu ndryshua masa e sigurisë nga paraburgim në arrest shtëpiak.

Në njoftimin e KFOR-it në Twitter u tha se operacioni për largimin e automjeteve të bllokuara në rrugë po bëhet për të rikthyer lirinë e lëvizjes në atë zonë.