17 të vdekur nga reshjet e dendura të borës në Japoni
Nga OraNews Përditësimi i fundit 26 Dhjetor 2022, 10:40
Shtatëmbëdhjetë të vdekur është bilanci i fundit nga reshjet e dendura të borës, që kanë goditur pjesën më të madhe të Japonisë gjatë dhjetë ditëve të fundit, ndërsa ndërprerjet e energjisë elektrike kanë lënë mijëra familje në terr.
Bora e dendur vazhdon në Japoni duke shkaktuar mbyllje të rrugëve dhe ndërprerje
Dëbora ka rënë ditët e fundit në ishullin Honshu, përgjatë Detit të Japonisë, si dhe në ishullin e madh verior të Hokkaido.
Transmetuesi publik "NHK" raportoi aksidente fatale që përfshinin njerëz të moshuar që kishin dalë për të pastruar borën rreth banesave të tyre ose në çatitë e tyre.
Në Hokkaido, dhjetëra mijëra familje përjetuan ndërprerje të energjisë ditët e fundit, por rrjeti tashmë është restauruar pothuajse plotësisht.
Agjencia Meteorologjike e Japonisë (JMA) ka këshilluar banorët në zonat e prekura që të mos dalin në rrugë me automjetet e tyre sepse rrezikojnë të bllokohen.
Intensiteti i reshjeve të borës pritet të zvogëlohet nga dita e sotme, njofton JMA.
