Indonezia kërkon të zbusë frikën për ndalimin e seksit paramartesor
Nga OraNews Përditësimi i fundit 12 Dhjetor 2022, 17:15
Qeveria indoneziane hodhi poshtë të hënën shqetësimet se turistët në vendin e arkipelagut mund të përballen me akuza të mundshme penale - dhe dënime me burg - për seks jashtë martesës
Një rishikim i madh i kodit penal u miratua unanimisht nga parlamenti indonezian javën e kaluar, duke shkaktuar shqetësime se ndryshimi i ligjit do të dëmtonte industrinë e rëndësishme të turizmit të vendit .
Cili është ligji i ri?
Një rishikim i ligjit penal ekzistues , legjislacioni i ri ndalon seksin jashtë martesës dhe bashkëjetesën mes çifteve të pamartuara.
Zyrtarët në vendin më të madh në botë me shumicë myslimane thonë se ndryshimet – që do të hyjnë në fuqi nga viti 2025 – kanë për qëllim të mbështesin “vlerat indoneziane”.
Kodi i ri, i cili gjithashtu duhet të miratohet nga presidenti indonezian Joko Widodo, përfshin dispozita që përcaktojnë se seksi jashtë martesës dënohet me një vit burg.
Ndërkohë, çiftet që jetojnë së bashku kur nuk janë të martuar mund të përballen me dënime me burg deri në gjashtë muaj.
Zëvendësministri i Ligjit dhe të Drejtave të Njeriut të Indonezisë, Edward Omar Sharif Hiariej hodhi poshtë shqetësimet të hënën, duke thënë se të huajt nuk do të ndiqen penalisht.
“Dua të theksoj për turistët e huaj, ju lutemi ejani në Indonezi sepse nuk do të ngarkoheni me këtë artikull”, u tha Hiariej gazetarëve.
Ai shtoi se si shkeljet e seksit jashtëmartesor ashtu edhe të bashkëjetesës do të ndiqen penalisht vetëm nëse raportohen nga bashkëshorti, prindi ose fëmija. Ai vuri në dukje se tradhtia bashkëshortore tashmë ishte e paligjshme për vite me rradhë./DW/
