Stamboll, 17 të akuzuar për sulmin me bombë
Nga OraNews Përditësimi i fundit 19 Nëntor 2022, 15:38
Gjykata Turke ka urdhëruar burgosjen e 17 të dyshuarve, në pritje të gjykimit në lidhje me një bombë vdekjeprurëse në një rrugë në Stamboll, duke i akuzuar ata për përpjekje kundër unitetit të shtetit, vrasje të qëllimshme dhe përpjekje për të vrarë, njoftoi të premten agjencia shtetërore e lajmeve turke.
Shpërthimi i 13 nëntorit kishte në shënjestër rrugën e zhurmshme Istiklal të Stambollit, një rrugë e njohur, e mbushur me dyqane dhe restorante, dhe la gjashtë persona të vdekur, duke përfshirë dy fëmijë. Më shumë se 80 të tjerë u plagosën.
Sulmi erdhi si një kujtesë tronditëse e bombave që goditën qytetet turke, midis 2015 dhe 2017, duke shkatërruar ndjenjën e sigurisë së publikut. Autoritetet turke fajësuan për shpërthimin e fundjavës së kaluar Partinë e jashtëligjshme të Punëtorëve të Kurdistanit, ose PKK, si dhe grupet kurde siriane të lidhura me të. Grupet militante kurde kanë mohuar përfshirjen.
Prokurorët morën në pyetje të dyshuarin kryesor në sulm, një grua siriane e cila akuzohet se kishte lënë një bombë të mbushur me TNT në Avenue Istiklal, për rreth pesë orë.
Gruaja, e identifikuar si Ahlam Albashir, dyshohet se u tha hetuesve se kishte hyrë ilegalisht në Turqi dhe kishte qëndruar në një shtëpi në Stamboll për katër muaj, duke u shtirur si çift me një nga të dyshuarit e tjerë.
Sipas agjencisë së lajmeve, Albashir dyshohet se kishte lënë një çantë me mjet shpërthyes në një stol në rrugë, por pretendoi se nuk e dinte se çfarë kishte brenda saj. Gjyqi pritet të caktohet pasi prokurorët do të përgatisin aktakuzën e tyre, e cila mund të zgjasë me muaj.
PKK ka luftuar një kryengritje të armatosur në Turqi që nga viti 1984. Konflikti ka vrarë dhjetëra mijëra njerëz që atëherë.
