Ambasadori i Rusisë në BE: Luftërat në Evropë rrallë fillojnë të mërkurën

Nga OraNews Përditësimi i fundit 16 Shkurt 2022, 09:51

Vladimir Chizhov ka përjashtuar mundësinë e një sulmi të afërt në Ukrainë. "Nuk do të ketë asnjë përshkallëzim në javën e ardhshme, ose në javën pas kësaj, ose në muajin e ardhshëm," tha ai për Die Welt.

I dërguari i Rusisë në Bashkimin Evropian, Vladimir Chizhov , ka hedhur poshtë sugjerimet se vendi i tij është gati të sulmojë Ukrainën.

New York Times citoi një burim të inteligjencës amerikane të thoshte se Moska po diskutonte këtë të mërkurë (16 shkurt) si një datë për veprim ushtarak në Ukrainë, të cilën Chizhov e mohoi në komentet e botuara në gazetën gjermane  Die Welt.

Çfarë tha Chizhov?

"Për sa i përket Rusisë, mund t'ju siguroj se nuk do të ketë asnjë sulm këtë të mërkurë," tha Chizhov për  Die Welt .

“Nuk do të ketë përshkallëzim as në javën e ardhshme, as në javën pas kësaj, as në muajin e ardhshëm”. 

"Luftërat në Evropë rrallë fillojnë të mërkurën," shtoi Chizhov.

Ambasadori i Moskës në Bruksel bëri komente të ngjashme në dhjetor.

Që atëherë, zyrtarët amerikanë kanë thënë se inteligjenca e tyre tregon se Rusia mund të planifikojë të sulmojë Ukrainën përpara përfundimit të Lojërave Olimpike Dimërore më 20 shkurt.

"Pra, ku janë provat?"

Chizhov dënoi akuzat e SHBA për një pushtim të mundshëm të Ukrainës.

"Kur bëni akuza, veçanërisht akuza shumë serioze kundër Rusisë, ju gjithashtu keni përgjegjësi të paraqisni prova. Përndryshe është shpifje," tha Chizhov.

"Pra, ku janë provat?" - pyeti Chizhov.

Ai i kërkoi Perëndimit që t'i marrë seriozisht shqetësimet e sigurisë së Rusisë, duke thënë se "kur partnerët tanë më në fund të dëgjojnë shqetësimet tona legjitime, një proces i detentimit nuk do të vonojë shumë".

"Kjo do të ishte në interes të të gjithë evropianëve nga Lisbona në Vladivostok, por edhe të të gjitha kombeve të tjera në botë," shtoi ai.

Rusia ka kërkuar që NATO të kufizojë aktivitetet në Evropën Lindore dhe të premtojë se nuk do t'i japë Ukrainës anëtarësimin në aleancë. Kremlini ka kërkuar gjithashtu ndalimin e vendosjes së sistemeve të armëve jashtë kufijve të Rusisë.