"Sulmi në Ukrainë është ende i mundur e kostoja njerëzore do ishte e madhe" Biden: Nuk e kemi verifikuar largimin e forcave ruse
Nga OraNews Përditësimi i fundit 15 Shkurt 2022, 22:13
"Një sulm rus në Ukrainë "është ende i mundshëm", por kostoja njerëzore do të ishte "e madhe", tha presidenti i SHBA Joe Biden.
Në komentet e transmetuara në televizion kombëtar, ai tha se SHBA ishte gati t'i përgjigjej me vendosmëri një lëvizjeje të tillë.
Rusia ka grumbulluar më shumë se 100,000 trupa pranë kufirit të Ukrainës, duke shkaktuar frikën e një pushtimi.
Ministri i Mbrojtjes ka thënë se disa forca tani janë tërhequr. Presidenti Biden paralajmëroi se kjo nuk ishte verifikuar, shkruan BBC.
“Ministri rus i Mbrojtjes raportoi sot se disa njësi ushtarake po largohen nga pozicionet e tyre pranë Ukrainës”, tha Biden.
"Kjo do të ishte mirë, por ne ende nuk e kemi verifikuar këtë. Nuk kemi verifikuar ende se njësitë ushtarake ruse po kthehen në bazat e tyre."
"Në të vërtetë, analistët tanë tregojnë se ata janë ende në një pozicion kërcënues."
Fjalimi i Biden erdhi disa orë pasi presidenti rus Vladimir Putin tha se shqetësimet e Moskës për sigurinë duhet të trajtohen dhe të merren seriozisht.
Putin gjithmonë ka mohuar se ai po planifikon një sulm dhe tha se Rusia nuk dëshiron një luftë tjetër në Evropë. Megjithatë, tensionet janë rritur që nga nëntori.
Rusia ka lidhje të thella kulturore dhe historike me Ukrainën, e cila është një ish-republikë sovjetike.
Putin kërkon garanci se nuk do t'i bashkohet aleancës ushtarake perëndimore të NATO-s, sepse ai e sheh çdo zgjerim të saj si një kërcënim për Rusinë.
NATO e ka refuzuar këtë kërkesë.
Biden tha se ishte dakord me një propozim të qeverisë ruse për të vazhduar diplomacinë.
