I dënuar për trafik droge në Itali, sekuestro preventive 8 apartamenteve dhe pasurive të tjera të Raul Zenunaj

Nga OraNews Përditësimi i fundit 15 Qershor 2021, 16:03

Tetë apartamente, dy dyqane, një garazh dhe një sipërfaqe toke në pronësi të Raul Zenunaj janë vendosur nën sekuestro preventive nga gjykata e Vlorës.

Pronat, një pjesë e të cilave ishin vendosur në emrin e familjarëve të 42-vjeçarit, dyshohet se janë produkt i veprimtarisë kriminale.

Zenunaj është duke vuajtur dënimin në një burg të Italisë për  “Prodhim dhe trafikim i drogës”, “Prodhim dhe shpërndarje e drogës” pasi u arrestua me 13 shkurt 2019 në kuadër të operacionit "Lulet e Pranverës" i shtrirë njëherësh në disa qytete në Shqipëri dhe Itali.

Për veprimtarinë e dyshuar kriminale ai ka qenë nën hetim prej vitit 2019, ndërsa dy ditë më parë Gjykata e Vlorës ka vendosur sekuestrimin e pasurive.

Me 4 gusht 2020, 42-vjeçari u bë subjekt i OFL-së ku policia i dërgoi formularin për burimin e pasurisë.

Ai dyshohet se ishte pjesë e një grupi me 36 persona të tjerë të dënuar për trafikimin e 8.5 ton kanabis, 10 kg kokainë e heroinë, si dhe armë dhe municione drejt Italisë.

Po kështu, Gjykata e Rrethit Gjyqësor Vlorë, ka vendosur me 12 qershor  caktimin e masës së sigurimit pasuror të sekuestros” ndaj shtetasve A. M. dhe S.B.  Bëhet fjalë për dy apartamente, dy automjete dhe një truall.

Më herët, GJKKO vendosi sekuestrimin e pasurive të shtetasit Bledar Seferi alias Hakorja dhe familjarëve të tij pasi nga verifikimet ka rezultuar se ka pasur lidhje me shtetasin Giovanni Di Cosimo dhe pjestarë të tjerë të grupit kriminal në Itali e Shqiperi dhe është i përfshirë në aktivitet kriminal të trafikimit të lëndëve narkotike në kuadër të grupit të strukturuar kriminal.

Në përfundim të verifikimeve SPAK ka kërkuar konfiskim për një fabrikë për prodhimin e lëndëve plastike në Shijak, 5954 m² arë dhe truall dhe ndërtesë 3070 m² në Durrës, ullishte me sipërfaqe 6550 m², 5 automjete, llogari bankare në shumën 3.103.244 lekë dhe 21.022 euro.

Bledar Hakorja, i njohur dhe me mbiemrin Seferi, është njëri nga anëtarët e grupit kriminal shqiptar “Kompania Bello”, i cili kryente trafikun e kokainës nga vendet e Amerikës Latinë në Europë. 

Njoftimi i plotë i prokurorisë

Prokuroria pranë Gjykatës së Shkallës së Parë Vlorë ka rregjistruar dhe po kryen hetime paraprake për proçedimin penal nr.1922 të vitit 2019, në ngarkim të shtetasit R.Z., banues në Vlorë, i dyshuar për kryerjen e veprës penale “Pastrimi i produkteve të veprës penale apo veprimtarisë kriminale“, parashikuar nga neni 287 i Kodit Penal. Nga të dhënat e administruara deri më tani, rezulton se shtetasi R.Z. është person i dënuar nga autoritetet gjyqësore të Italisë, për vepra penale “Prodhim dhe trafikim i drogës”; “Prodhim dhe shpërndarje e drogës”, etj. Prokuroria Vlorë ka dyshime të arsyeshme se të ardhurat e paligjshme të përfituara nga aktiviteti kriminal i zhvilluar në shtetin Italian, janë investuar në blerjen e pasurive të paluajtshme në qytetin e Vlorës. Në funksion të këtij procedimi penal nr.1922 të vitit 2019 dhe mbi bazën e kërkesës së prokurorit, me vendimin nr.1480, datë 13.06.2021, Gjykata e Rrethit Gjyqësor Vlorë, ka vendosur “Caktimin e masës së sigurimit pasuror të sekuestros preventive” për pasuritë e  mëposhtme:

1.Dy “Njësi” me sipërfaqe totale prej 70 m² dhe 50 m² në Vlorë, në pronësi të shtetasit

     R.Z..

2.Një pasuri e llojit “Garazh”, me sipërfaqe 27.7m², ndodhur në Vlorë, në pronësi të

     shtetases A.M..

3. Tetë pasuri të paluajtshme të llojit “Apartament”:

- Apartament me sipërfaqe 159m², në lagjen “Kushtrimi”, Vlorë, në pronësi të shtetasit V. Z..

- Apartament me sipërfaqe 171m², në lagjen “Kushtrimi”, Vlorë, në bashkëpronësi të shtetasëve V.Z.dhe A.M..

- Apartament me sipërfaqe prej 236 m² (komplet kati), në lagjen “Uji i Ftohtë”, Vlorë, e shtetasit E.Z., porositur nëpërmjet kontratës kundrejt shumës prej 116.000 (njëqind e gjashtëmbëdhjetë mijë) euro.

- Apartament me sipërfaqe 87 m², në lagjen “Uji i Ftohtë”, Vlorë në pronësi të shtetasit V. Z. e porositur me kontratën kundrejt shumës prej 50.000 euro.

- Apartament i shtetases A.M., me sipërfaqe 82m², në lagjen “Ujë i Ftohtë” Vlorë, e porositur me kontratën kundrejt shumës prej 60.000 (gjashtëdhjetë mijë) euro.

- Apartament 2+1, me sipërfaqe prej 118 m², e shtetasve E.Z. dhe M.Z., në lagjjen “Ujë i Ftohtë” Vlorë, e porositur me kontratën kundrejt shumës 58.000 (pesëdhjetë e tetë) mijë euro.

- Apartament 3+1, me sipërfaqe prej 119 m², e shtetasve E.Z. dhe M.Z., në lagjjen “Ujë i Ftohtë” Vlorë.

- Apartament, me sipërfaqe prej 232 m², e shtetasit V.Z., në lagjjen “Ujë i Ftohtë” Vlorë, blerë për çmimin prej 116.000 (Njëqind e gjashtëmbëdhjetë mije) euro.

 

4.Pasuri e paluajtshme e llojit “Tokë arë”, me sipërfaqe prej 5000 m², në bashkëpronësi të shtetasëve S.Z., L.Z., E.Z., R.Z., V.Z., V.Z., E.R.

5.Pasuri e paluajtshme e llojit “Truall”, ndodhur në lagjen “Kushtrimi”, Vlorë, në bashkëpronësi të shtetasëve V.Z. dhe A.M..

6. Pasuri e paluajtshme e llojit “Bodrum”, me sipërfaqe prej 181m², lagjja “Kushtrimi”, Vlorë, në bashkëpronësi të shtetasëve V.Z. dhe A.M.

7. Pasuri e paluajtshme “shtesë 4-kate”, në bashkëpronësi të shtetasëve V.Z. dhe A.M.

8. Automjet i markës BMW, GM 730 D, në pronësi të shtetasit R.Z”.

Po kështu prokuroria pranë Gjykatës së Shkallës së Parë Vlorë, ka rregjistruar procedim pasuror ndaj shtetasve A. M. dhe S.B. të shpallur në kërkim ndërkombëtar si të dyshuar për veprat penale të “Trafikimit ndërkombëtar të lëndëve narkotike" dhe "Organizatë Kriminale" nga autoritetet Italiane.

Në kuadër të procedimit pasuror nr.02 të vitit 2021 dhe mbi bazën e kërkesës së prokurorit, me vendimin nr.1479, datë 12.06.2021, Gjykata e Rrethit Gjyqësor Vlorë, ka vendosur “Caktimin e masës së sigurimit pasuror të sekuestros” për pasuritë e  mëposhtme:

1.  Apartament me sip.93 m², në emër të M.M. çmimi 39.000 Euro.

2.  “Truall” me sip.160 m² dhe sip. ndërt. 40 m², në emër të A.M. çmimi 1.900.000 lekë.

3.  Apartament 23 % të pasurisë me sip.164 m², në emër të A.M. çmimi 60.000 euro.

4. Automjet Benz E 300, në pronësi të S.M.

5.  Automjet Citroen Berlingo, në pronësi të shtetasit A.M..

Në zbatim të vendimeve gjyqësore janë nxjerrë urdhërat e ekzekutimit të prokurorit të cilat po ekzekutohen nga shërbimet e policisë gjyqësore të Drejtorisë Vendore të Policisë Vlorë.